Thursday, August 31, 2006

ജ്യോതിശാസ്ത്രത്തില്‍ ഉപയോഗിക്കുന്ന ഏകകങ്ങള്‍- ഭാഗം I

ജ്യോതിശാസ്ത്രത്തിലെ ഉപയോഗിക്കുന്ന വിവിധ ഏകകങ്ങളെ (Units) പരിചയപ്പെടുത്തുന്ന ലേഖനത്തിന്റെ ആദ്യ ഭാഗം ആണ് . മറ്റ്‌ ഏകകങ്ങളെ ഉപയോഗിക്കേണ്ട സന്ദര്‍ഭം വരുമ്പോള്‍ പരിചയപ്പെടുത്താം. ഈ ഭാഗത്ത്‌ കോണീയ അളവിന്റേയും, ദൂരം/നീളം-ത്തിന്റേയും, ദ്രവ്യമാനത്തിന്റേയും, സമയത്തിന്റേയും ഏകകങ്ങളെ പരിചയപ്പെടുത്തുന്നു.


വലിയ കാര്യമൊന്നും ഇല്ല. വക്കാരി പറയുന്നത്‌ പോലെ ഒരു ചുമ്മാ പോസ്റ്റ്.


1. കോണീയ അളവ്‌ (Angular measure)

ജ്യോതിര്‍ഗോളങ്ങളുടെ സ്ഥാനവും ഭൂമിയില്‍ നിന്ന്‌ നോക്കുമ്പോള്‍ അവയുടെ വലിപ്പവും മറ്റും സൂചിപ്പിക്കുവാനും ജ്യോതിശ്ശാസ്ത്രജ്ഞര്‍ക്ക്‌ ഏറ്റവും അധികം ഉപയോഗിക്കേണ്ടി വരുന്ന ഒരു ഏകകം ആണ് കോണീയ അളവ്‌ (Angular measure). ഇത്‌ നമ്മള്‍ക്കെല്ലാം പരിചയം ഉള്ളതും നമ്മള്‍ ചെറിയ ക്ലാസ്സ്‌ തൊട്ടേ പഠിക്കുന്നതും ആണ്. കോണിനെ ഏറ്റവും ലളിതമായി ഒരു common ബിന്ദുവില്‍ കൂട്ടിമുട്ടുന്ന രണ്ട്‌ രേഖകളുടെ ഇടയിലുള്ള ആളവ്‌ എന്ന്‌ നിര്‍വചിക്കാം.
i. ഡിഗ്രി
കോണീയ അളവിന്റെ ഏറ്റവും അടിസ്ഥാനപരമായ ഏകകം ഡിഗ്രി (degree) ആണ്. അതിനെ ° എന്ന ചിഹ്നം കൊണ്ട്‌ സൂചിപ്പിക്കുന്നു.
ജ്യോതിശാസ്ത്രജ്ഞര്‍ ഒരു ഖഗോളവസ്തുവിന്റെ ഭൂമിയില്‍ നിന്ന്‌ നോക്കുമ്പോള്‍ ഉള്ള വലിപ്പത്തെ (Apparent Size) സൂചിപ്പിക്കാന്‍ കോണീയ അളവ്‌ ഉപയോഗിക്കുന്നു. ഉദാഹരണത്തിന് സൂര്യന്റെ വ്യാസം ഭൂമിയില്‍ നിന്ന്‌ നിരീക്ഷിക്കുന്ന ഒരാളുടെ മേല്‍ ചെലുത്തുന്ന കോണീയ അളവ്‌ 1/2 ഡിഗ്രി (0.5°) ആണ്. ചന്ദ്രന്റേതും ഇത്ര തന്നെ. (ചിത്രം കാണുക)

ചന്ദ്രന്റെ കോണീയ അളവ്‌

ജ്യോതിശാസ്ത്രജ്ഞര്‍ ചന്ദ്രന്റേയും സൂര്യന്റേയും കോണീയ അളവ്‌ 0.5° ആണെന്ന്‌ പറയും. ചന്ദ്രന്റെ കോണീയ അളവ്‌ തന്നെ അര ഡിഗ്രി ആണെങ്കില്‍ അതിലും എത്രയോ ചെറിയ വസ്തുക്കളെ സൂചിപ്പിക്കാന്‍ ഡിഗ്രി മതിയാകില്ല. അതിനാല്‍ ഡിഗ്രിയെ പിന്നേയും ചെറുതായി വിഭജിച്ച്‌ ആര്‍ക്ക്‌ മിനിറ്റും ആര്‍ക്ക്‌ സെക്കന്റും ഉപയോഗിക്കേണ്ടി വരുന്നു. ഒരു ഡിഗ്രിയെ 60 ഭാഗമായി തിരിക്കുമ്പോള്‍ ലഭിക്കുന്ന ഒരു ഭാഗത്തിന് ഒരു ആര്‍ക് മിനിറ്റ് എന്ന്‌ പറയുന്നു. ഈ ഒരു മിനിറ്റിനെ 60 ഭാഗമായി ഭാഗിക്കുമ്പോള്‍ ലഭിക്കുന്ന ഒരു ഭാഗത്തിന് ഒരു ആര്‍ക് സെക്കന്റ്‌ എന്ന് പറയുന്നു. ആര്‍ക് മിനിറ്റിനെ എന്ന ചിഹ്നം കൊണ്ടും ആര്‍ക് സെക്കനന്റിനെ ‘‘ എന്ന ചിഹ്നം കൊണ്ടും സൂചിപ്പിക്കുന്നു.

1°=60 ആര്‍ക് മിനിറ്റ് = 60
1=60 ആര്‍ക് സെക്കന്റ്‌ = 60‘‘
1°=60=3600‘‘

ഉദാഹരണത്തിന് ശനി ഗ്രഹത്തെ ഭൂമിയില്‍ നിന്ന്‌ നോക്കുമ്പോള്‍ ഉള്ള കോണീയ അളവ്‌ 17.9 ‘’. അതില്‍ നിന്ന്‌ അത്‌ എത്രയും ചെറുതാണെന്ന്‌ ഊഹിക്കാമല്ലോ.

ii. റേഡിയന്‍ (radian)

കോണീയ അളവിന്റെ മറ്റൊരു പ്രധാന ഏകകം ആണ് radian (റേഡിയന്‍). ഡിഗ്രിയുടെ കണക്കില്‍ നമ്മള്‍ ഒരു വൃത്തത്തില്‍ 360 ഡിഗ്രി ഉണ്ടെന്ന് പറയും. എന്നാല്‍ റേഡിയന്‍ കണക്കില്‍ ഒരു വൃത്തത്തില്‍ 2π റേഡിയന്‍ ഉണ്ടെന്ന് പറയും.
അതായത്,

2π rad = 360°

π rad = 180°

1 rad = (180/π)°

= (180* 60* 60/π) ആര്‍ക്ക് സെകന്റ് = 206265 ‘’

1 rad = 206265 ‘’

അതായത് ഒരു റേഡിയനില്‍ 206265 ‘’ ഉണ്ടെന്ന് നമുക്ക് കിട്ടുന്നു.

ഇതു വളരെ പ്രാധാന്യം ഉള്ള ഒരു ഉത്തരം ആണ്. പാര്‍സെക് എന്ന ഏകകത്തെ കുറിച്ചു പഠിക്കുമ്പോഴും പാരലാക്സിനെ കുറിച്ച് പഠിക്കുമ്പോഴും ഇതിനു വളരെ പ്രാധാന്യം ഉണ്ട്. കൂടുതല്‍ വിവരം പാരലാക്സിനെ കുറിച്ചുള്ള പോസ്റ്റില്‍.


2. ദൂരം/നീളം/വലിപ്പം (Length/Distance)

അടുത്തത്‌ ദൂരത്തെ സൂച്ച്പ്പിക്കുവാന്‍ ജ്യോതിശാസ്ത്രജ്ഞര്‍ ഉപയോഗിക്കുന്ന ഏകകങ്ങള്‍ ഏതൊക്കെ ആണെന്ന്‌ നോക്കാംനമ്മള്‍ സാധാരണ ഭൂമിയെ ആവശ്യത്തിന് ദൂരം അല്ലെങ്കില്‍ വലിപ്പത്തെ സൂചിപ്പിക്കാന്‍ മീറ്ററും കിലോമീറ്ററും ഒക്കെ ആണ് ഉപയോഗിക്കുന്നത്‌.

പക്ഷെ ബഹിരാകാശത്തെ ദൂരം സൂചിപ്പിക്കാന്‍ ഈ ഏകകം അപര്യാപ്തമാണ്. കാരണം ഭൂമിയോട്‌ ഏറ്റവും അടുത്തു കിടക്കുന്ന ഖഗോള വസ്തുവായ ചന്ദ്രനിലേക്കുള്ള ദൂരം തന്നെ 3,84,403 കിലോമീറ്റരാണ്. അപ്പോള്‍ മറ്റ്‌ ഗ്രഹങ്ങളിലേക്കും, സൂര്യനിലേക്കും, നക്ഷത്രങ്ങളിലേക്കുമൊക്കെയുള്ള ദൂരം കിലോമീറ്ററില്‍ സൂചിപ്പിക്കാന്‍ തുടങ്ങിയാല്‍ ആ സംഖ്യ മനുഷ്യന് സങ്കല്‍പ്പിക്കാവുന്നതിലും വലുതായിരിക്കുമെന്ന്‌ മനസ്സിലാക്കാമല്ലോ. അതിനാല്‍ ജ്യോതിശാസ്ത്രജ്ഞര്‍ക്ക്‌ ദൂരത്തെ സൂചിപ്പിക്കാന്‍ മറ്റ്‌ ഏകകങ്ങള്‍ കണ്ടെത്തേണ്ടി വന്നു. അവ താഴെ പറയുന്നു.

i. അസ്‌ട്രോണൊമിക്കല്‍ യൂണിറ്റ് (AU)

ഇത്‌ സൌരയൂഥത്തിലെ ഗ്രഹങ്ങളും സൂര്യനും മറ്റ്‌ വസ്തുക്കള്‍ തമ്മിലുള്ള ദൂരം സൂചിപ്പിക്കാനാണ് ഉപയോഗിക്കുന്നത്‌. ലളിതമായി പറഞ്ഞാല്‍ സൂര്യനും ഭൂമിയും തമ്മിലുള്ള ദൂരം എത്രയാണോ അതാണ് ഒരു അസ്‌ട്രോണൊമിക്കല്‍ യൂണിറ്റ് .

ഒരു അസ്‌ട്രോണൊമിക്കല്‍ യൂണിറ്റ്

ഇത്‌ വളരെ കൃത്യമായി പറഞ്ഞാല്‍ 149,597,870 കിലോമീറ്ററാണ് . സൂര്യനില്‍ നിന്ന്‌ ഭൂമിയിലേക്ക്‌ പതിനാല് കോടി തൊണ്ണൂറ്റി അഞ്ച്‌ ലക്ഷത്തി തൊണ്ണൂറ്റി ഏഴായിരത്തി എണ്ണൂറ്റി എഴുപത്‌ കിളൊമീറ്ററാണ് എന്ന്‌ പറയുന്നതാണോ ഒരു അസ്‌ട്രോണൊമിക്കല്‍ യൂണിറ്റ് ആണ് എന്ന്‌ പറയുന്നതാണോ എളുപ്പം. സൂര്യനില്‍ നിന്ന്‌ ഭൂമിയിലേക്ക്‌ ഇത്ര ദൂരം ആണെങ്കില്‍ മറ്റ്‌ ഗ്രഹങ്ങളിലേക്ക്‌ എത്ര വലിയ സഖ്യയായിരിക്കും എന്ന്‌ ഊഹിക്കാമല്ലോ. അപ്പോള്‍ എന്ത്‌ കൊണ്ടാണ് ഇങ്ങനെ ഒരു ഏകകം ജ്യോതിശാസ്ത്രജ്ഞര്‍ ഉപയോഗിക്കാന്‍ തുടങ്ങിയത്‌ എന്ന്‌ മനസ്സിലാക്കാമല്ലോ.

ഈ ഏകക പ്രകാരം സൂര്യനില്‍ നിന്ന്‌

ചൊവ്വയിലേക്ക്‌ - 1.52 AU
വ്യാഴത്തിലേക്ക്‌ -5.2 AU
പ്ലൂട്ടോയിലേക്ക്‌ - 39.5 AU
ഇങ്ങനെയാണ് വിവിധ ഗ്രഹങ്ങളിലേക്കുള്ള ദൂരം.

ജുപിറ്ററിനെയും മറ്റ്‌ ഗ്രഹങ്ങളേയും പഠിക്കാന്‍ മനുഷ്യന്‍ വിക്ഷേപിച്ച വോയേജര്‍ 1 എന്ന ബഹിരാകാശ വാഹനം ഇപ്പോള്‍ സൂര്യനില്‍ നിന്ന്‌ 100 AU ദൂരത്താണെന്ന്‌ പറയപ്പെടുന്നു. വിവിധ ഗ്രഹങ്ങളിലേക്ക്‌ സൂര്യനില്‍ നിന്ന്‌ AU ഏകകത്തില്‍ ഉള്ള ദൂരം‍ താഴെയുള്ള പട്ടികയില്‍ കൊടുത്തിരിക്കുന്നു.

ഗ്രഹംസൂര്യനില്‍ നിന്ന്‌ ഗ്രഹത്തിലേക്ക്‌ AU ഏകകത്തില്‍ ഉള്ള ദൂരം‍
ബുധന്‍0.3871
ശുക്രന്‍0.7233
ഭൂമി1.000
ചൊവ്വ1.5236
വ്യാഴം5.2028
ശനി9.5387
യുറാനസ്‌19.1913
നെപ്റ്റ്യൂണ്‍30.0610


അപ്പോള്‍ സൌരയൂഥത്തിലെ വസ്തുക്കള്‍ തമ്മിലുള്ള അകലം സൂചിപ്പിക്കാന്‍ AU മതി. ഇനി ഇപ്പോള്‍ സൌരയൂഥം വിട്ട്‌ പുറത്തേക്ക്‌ നക്ഷത്രങ്ങളിലേക്കുള്ള ദൂരം ഒക്കെ പറയുമ്പോഴോ.

ഉദാഹരണത്തിന് സൂര്യന്‍ കഴിഞ്ഞാല്‍ നമ്മളോട്‌ ഏറ്റവും അടുത്ത നക്ഷത്രമായ പ്രോക്സിമാ സെന്‍‌ടോറിയിലേക്ക്‌ AU ന്റെ കണക്കില്‍ തന്നെ പറഞ്ഞാല്‍ 2, 68,000 AU ആണ് ദൂരം. അപ്പോള്‍ അതിനും അപ്പുറം കിടക്കുന്ന നക്ഷത്രങ്ങളിലേക്കും ഗാലക്സികളിലേക്കും മറ്റുമുള്ള ദൂരം AU ല്‍ സൂചിപ്പിച്ചാല്‍ നമുക്ക്‌ സങ്കല്‍പ്പിക്കാന്‍ പറ്റാത്ത അത്രയും വലിയ സംഖ്യയാകും.അതു കൊണ്ട്‌ ജ്യോതിശാസ്ത്രജ്ഞര്‍ക്ക്‌ വേറൊരു ഏകകം കൂടി ഉപയോഗിക്കേണ്ടി വന്നു. അതാണ് അടുത്തത്‌.

ii. പ്രകാശ വര്‍ഷം (Light year)

പ്രകാശം ഒരു സെക്കന്റില്‍ 3 ലക്ഷം കിലോമിറ്റര്‍ സഞ്ചരിക്കും എന്ന്‌ നിങ്ങള്‍ കേട്ടിട്ടുണ്ടാവുമല്ലോ. ഈ കണക്കില്‍ ഒരു മിനിറ്റ്‌ കൊണ്ട്‌ തന്നെ ഏകദേശം ഒരു കോടി എണ്‍പത്‌ ലക്ഷം കിലോമീറ്റര്‍ സഞ്ചരിക്കും. അപ്പോള്‍ ഒരു വര്‍ഷത്തിലോ. പ്രകാശം ഒരു വര്‍ഷം കൊണ്ട്‌ ഏകദേശം 95,000 കോടി കിലോമീറ്റര്‍ സഞ്ചരിക്കും. അപ്പോള്‍ ഇതിനെ ഒരു ഏകകം ആക്കിയാല്‍ നക്ഷത്രങ്ങളിലേക്കൊക്കെയുള്ള ദൂരം സൂചിപ്പിക്കാന്‍ നല്ലൊരു ഏകകം ആയി. അതാണ് ജ്യോതിശാസ്ത്രജ്ഞന്മാര്‍ ചെയ്തത്‌.

ഈ ഏകകം അനുസരിച്ച്‌ നമ്മളോട്‌ ഏറ്റവും അടുത്ത നക്ഷത്രമായ പ്രോക്സിമാ സെന്‍‌ടോറിയിലേക്ക്‌ ഉള്ള ദൂരം 4.2 പ്രകാശ വര്‍ഷമാണ്. ഈ ഏകകത്തിന്റെ വേറൊരു മെച്ചം ഒരു നക്ഷത്രത്തിലേക്കോ ഗാലക്സികളിലേക്കോ ഉള്ള അകലം പ്രകാശ ‌വര്‍ഷ ഏകകത്തില്‍ അറിഞ്ഞാല്‍ നമ്മള്‍ അത്രയും വര്‍ഷം പുറകിലേക്കാണ് നോക്കുന്നത്‌ എന്നര്‍ത്ഥം.


ഉദാഹരണത്തിന് പ്രോക്സിമാ സെന്‍‌ടോറിയിലേക്ക്‌ ഉള്ള ദൂരം 4.2 പ്രകാശ വര്‍ഷമാണ് എന്ന്‌ പറഞ്ഞാല്‍ ആ നക്ഷത്രത്തില്‍ നിന്ന്‌ 4.2 വര്‍ഷം മുന്‍പ്‌ പുറപ്പെട്ട പ്രകാശം ആണ് നമ്മള്‍ ഇപ്പോള്‍ കാണുന്നത്‌ എന്ന്‌ അര്‍ത്ഥം. അതായത്‌ 4.2 വര്‍ഷം മുന്‍പുള്ള പ്രോക്സിമാ സെന്‍‌ടോറിയെ ആണ് നമ്മള്‍ ഇന്ന്‌ കാണുന്നത്‌ . അപ്പോള്‍ നമ്മള്‍ ഇന്ന്‌ ഭൂമിയില്‍ നിന്ന്‌ നിരീക്ഷിക്കുമ്പോള്‍ കാണുന്ന നക്ഷത്രങ്ങളുടേയും ഗ്ഗാലക്സ്സികളുമൊക്കെ എത്രയും പ്രകാശ വര്‍ഷം അകലെയാണോ അത്രയും വര്‍ഷം മുന്‍പുള്ള നക്ഷത്രങ്ങളുടേയും ഗ്ഗാലക്സ്സികളുമൊക്കെ ആണ് നമ്മള്‍ കാണുന്നത്‌ എന്ന്‌ സാരം.

iii. പാര്‍സെക്‌ (Parsec)

പ്രകാശ വര്‍ഷം കൂടാതെ വേറൊരു ഏകകം കൂടി നക്ഷത്രങ്ങളിലേക്കും ഗാലക്സികളിലേക്കും ഒക്കെ ഉള്ള ദൂരം കണക്ക്‌ കൂട്ടാന്‍ ഉപയോഗിക്കുന്നുണ്ട്‌. അതിന്റെ പേരാണ് പാര്‍സെക്. ഇത്‌ പ്രകാശ വര്‍ഷത്തിലും വലിയ ഏകകം ആണ്. ആദ്യം പാര്‍സെക് എന്താണെന്ന്‌ വിശദീകരിക്കാം. താഴെയുള്ള ചിത്രം ശ്രദ്ധിക്കൂ.

ഒരു പാര്‍സെക്‌

ചിത്രത്തില്‍ കാണിച്ചിരിക്കുന്ന പ്രകാരം സൂര്യനും ഭൂമിയും തമ്മിലുള്ള അകലം 1 AU ആണെന്ന്‌ നമ്മള്‍ മുകളിലെ വിശദീകരണത്തില്‍ നിന്ന്‌ മനസ്സിലാക്കി. ഈ 1 AU ദൂരം, ഒരു ആര്‍ക്ക്‌ സെക്കന്റ്‌ കോ‍ണീയ ആളവ്‌ എത്രയും ദൂരത്താണോ ചെലുത്തുന്നത്‌ അതിനെയാണ് ഒരു പാര്‍സെക്‌ എന്ന്‌ പറയുന്നത്‌ . (One parsec is the distance at with 1 AU subtends an angle of one arc second). ഇത്‌ വളരെ കൃത്യമായി പറഞ്ഞാല്‍ 30.857×1012 കിലോമീറ്റര്‍ ആണ്. എന്തൊരു വലിയ സംഖ്യ അല്ലേ. ഇത്രയും കിലോമീറ്ററിനെ പ്രകാശവര്‍ഷത്തിലേക്ക്‌ മാറ്റിയാല്‍ 3.26 പ്രകാശ വര്‍ഷം ആണെന്ന്‌ കിട്ടുന്നു. അതായത്‌ ഒരു പാര്‍ സെക്‌ എന്ന്‌ പറഞ്ഞാല്‍ 3.26 പ്രകാശ വര്‍ഷം.

ഇത്രയും കിലോമീറ്ററിനെ AU ഏകകത്തിലേക്ക് മാറ്റിയാല്‍ 206265 AU എന്നു കിട്ടുന്നു. അതായത് 206265 AU കൂടിയതാണ് ഒരു പാര്‍സെക്ക്. 1 rad = 206265 ‘’ എന്ന ഉത്തരത്തിന്റെ പ്രാധാന്യം ഇപ്പോള്‍ മനസ്സിലാക്കുന്നുണ്ടോ. കൂടുതല്‍ പാരലാക്സിനെ കുറിച്ചുള്ള പോസ്റ്റില്‍.

നമ്മളോട്‌ ഏറ്റവും അടുത്ത നക്ഷത്രമായ പ്രോക്സിമാ സെന്‍‌ടോറിയിലേക്ക്‌ ഉള്ള ദൂരം 1.29 പാര്‍സെക് ആണ്. നമ്മുടെ ഗാലക്സിയായ ആകാശ ഗംഗയുടെ മദ്ധ്യത്തിലേക്ക്‌ 8000 പാര്‍സെക് ദൂരമുണ്ട്‌. നമ്മുടെ സ്വന്തം ഗാലക്സിയുടെ മദ്ധ്യത്തിലേക്ക്‌ തന്നെ ഇത്രയും ദൂരമുണ്ടെങ്കില്‍ മറ്റുള്ള ഗാലക്സികളിലേക്ക്‌ എത്രയധികം ദൂരം ഉണ്ടാകും. അതിനെ ഒക്കെ സൂചില്‍പ്പിക്കാന്‍ കിലോ പാര്‍സെകും (103 പാര്‍സെകും) മെഗാ പാര്‍സെകും (106 പാര്‍സെകും) ഒക്കെ ജ്യോതി ശാസ്ത്രജ്ഞര്‍ ഉപയോഗിക്കുന്നു. ഉദാഹരണത്തിന് നമ്മുടെ തൊട്ടടുത്ത ഗാലക്സിയായ ആന്‍ഡ്രോമിഡ ഗാലക്സ്സിയിലേക്ക്‌ 0.77 മെഗാ പാര്‍സെക്‌ ദൂരമുണ്ട്‌. നമ്മുടെ പ്രപഞ്ചം എത്ര വലിയതാണ് അല്ലേ.

പാരലാക്സിനെ കുറിച്ച് പറയുമ്പോള്‍ പാര്‍സെക്കിന്റെ ശരിയായ ഉപയോഗം മനസ്സിലാകും.


ദൂരെയുള്ള നക്ഷത്രങ്ങളിലേക്കും ഗാലക്സികളിലേക്കും ഉള്ള ദൂരം പറയുമ്പോള്‍ പ്രകാശ വര്‍ഷവും പാര്‍സെകും ഉപയോഗിക്കാറുണ്ട്‌‌.

3. ദ്രവ്യമാനം (Mass)

അവസാനമായി ഈ പോസ്റ്റില്‍ ജ്യോതി ശാസ്ത്രജ്ഞര്‍ ദ്രവ്യമാനത്തെ സൂചിപ്പിക്കാന്‍ ഉപയോഗിക്കുന്ന ഏകകം കൂടി പരിചയപ്പെടുത്തട്ടെ.നമ്മള്‍ സാധാരണ ദ്രവ്യമാനത്തെ സൂചിപ്പിക്കാന്‍ കിലോഗ്രാമും ടണ്ണും ഒക്കെ ആണ് ഉപയോഗിക്കുന്നത്‌. ജ്യോതിശാസ്ത്രജ്ഞരും ഒരു പരിധി വരെ കിലോഗ്രാമാണ് ഉപയോഗിക്കുന്നത്‌. ഉദാഹരണത്തിന് ഭൂമിയുടേയും ഗ്രഹങ്ങളുടേയും ഒക്കെ ദ്രവ്യമാനം പറയാന്‍ കിലോഗ്രാമാണ് ഉപയോഗിക്കുന്നത്‌. ഭൂമിയുടെ ദ്രവ്യമാനം 5.9742×10^24 കിലോഗ്രാമാണ്. വ്യാഴത്തിന്റെ ദ്രവ്യമാനം 1.899×10^27 കിലോഗ്രാമാണ്. സൂര്യന്റേത്‌ 1.988 435 × 10^30 കിലോഗ്രാമാണ്.

ഇങ്ങനെ വര്‍ഗ്ഗം ഇട്ട്‌ എത്ര കിലോഗ്രം വരെ വേണമെങ്കിലും പറയാം. പക്ഷെ മനുഷ്യന് സംഖ്യ
വലുതാകുംതോറും അതിന്റെ വലിപ്പത്തെ കുറിച്ച്‌ ഊഹിക്കാന്‍ പ്രയാസമാകും. പക്ഷെ നമ്മളോട്‌ വ്യാഴത്തിന് ഭൂമിയുടെ 317 ഇരട്ടി ദ്രവ്യമാനം ഉണ്ടെന്ന്‌ പറഞ്ഞാല്‍ നമുക്ക്‌ വ്യാഴത്തിന്റെ ഭൂമിയെ അപേക്ഷിച്ചുള്ള ദ്രവ്യമാനം വലിപ്പവും ഊഹിക്കാന്‍ പറ്റുന്നു.

അതേ പോലെ സൂര്യന്റെ ദ്രവ്യമാനം അടിസ്ഥാനമാക്കി ശാസ്ത്രജ്ഞന്മാര്‍ പുതിയ ഒരു ഏകകം കൂടി നിര്‍വചിച്ചു. അതാണ് സൌര ദ്രവ്യമാനം. അതായത്‌ സൂര്യന്റെ ദ്രവ്യമാനമായ 1.988 435 × 10^30കിലോഗ്രാമിനെ ഒരു ഏകകം ആയി കരുതി. അപ്പോള്‍ നക്ഷത്രളുടേയും മറ്റും ദ്രവ്യമാനം സൂചിപ്പിക്കാന്‍ പറ്റിയ നല്ലൊരു ഏകകം കിട്ടി. ഈ ഏകകത്തെ M๏ എന്ന ചിഹ്നം കൊണ്ടാണ് സൂചിപ്പിക്കുന്നത്‌ (M എന്നെഴുതി അതിന്റെ അടിയില്‍ നടുക്ക്‌ ഒരു കുത്തുള്ള വൃത്തം ഇടുന്നു. ) . ഈ ഏകക പ്രകാരം പ്രോക്സിമാ സെന്‍‌ടോറിയുടെ ഭാരം 0.12 M๏ ആണ്. ധ്രുവ നക്ഷത്രത്തിന്റേത്‌ 6 M๏ ആണ്. തിരുവാതിര നക്ഷത്രത്തിന്റെ ഭാരം 15 M๏ ആണെന്നും പറയപ്പെടുന്നു.

4. സമയം (Time)

സമയം എന്നത്‌ കൊണ്ട്‌ ജ്യോതിശാസ്ത്രത്തില്‍ ഉദ്ദേശിക്കുന്നത്‌ രണ്ട്‌ സംഭവങ്ങള്‍ തമ്മിലുള്ള ഇടവേളയെയാണ്. സമയം സൂചിപ്പിക്കാന്‍ നമ്മള്‍ നിത്യജീവിതത്തില്‍ ഉപയോഗിക്കുന്ന സെക്കന്റും വര്‍ഷവും ഒക്കെ തന്നെയാണ് ജ്യോതിശാസ്ത്രജ്ഞന്മാരും ഉപയോഗിക്കുന്ന് ‌. അപൂര്‍വ്വമായി മിനിറ്റും മണിക്കൂ‍റും ഉപയോഗിക്കാറുണ്ട്‌. ഉദാഹരണത്തിന് പ്രപഞ്ചത്തിന്റെ പ്രായം പറയുമ്പോള്‍ ഏതാണ്ട്‌ 1300 കോടി വര്‍ഷം ആയെന്ന്‌ പറയും. പക്ഷെ സൂര്യന്റെ പ്രകാശം ഭൂമിയില്‍ എത്താന്‍ എട്ട്‌ മിനിറ്റ്‌ എടുക്കും എന്ന്‌ പറയും. പക്ഷെ പ്രപഞ്ചം ഉണ്ടായി 10^-4 സെക്കന്റ് ആയപ്പോഴാണ് സമമിതി തകര്‍ച്ച (Symmetry Breaking) ഉണ്ടായി നാല് ബലങ്ങളും വേര്‍പ്പെട്ടത്‌ എന്ന്‌ പറയും.

Tuesday, August 22, 2006

ഞാറ്റുവേലയും നക്ഷത്രങ്ങളും

രാഹുകേതുക്കളെ കൂറിച്ച്‌ സൂച്ചിപ്പിച്ചത്‌ കൊണ്ട്‌ നമ്മള്‍ മലയാളികള്‍ നിത്യജീവിതത്തില്‍ കുറയേറെ പരാമര്‍ശിക്കുന്ന നക്ഷത്രങ്ങളെ കുറിച്ച്‌ ഒരു ചെറിയ പോസ്റ്റ്. ഇത്‌ ജ്യോതിഷവുമായി ബന്ധപ്പെട്ട ലേഖനമല്ല എന്ന്‌ ആദ്യമേ പറയട്ടെ.

നക്ഷത്രരാശികള്‍ എന്താണെന്നും അത്‌ ഏതൊക്കെയാണെന്നും രാശിചക്രം എന്താണെന്നും അതിലെ നക്ഷത്രരാശികള്‍ ഏതൊക്കെയാണെന്നും നമ്മള്‍ കഴിഞ്ഞ കുറച്ച്‌ ലേഖനങ്ങളിലൂടെ മനസ്സിലാക്കി. ഈ ലേഖനത്തില്‍ രാശിചക്രത്തെ എങ്ങനെയാണ് നക്ഷത്രങ്ങളായി വിഭജിച്ചിരിക്കുന്നത്‌ എന്ന്‌ നോക്കാം.രാശിചക്രത്തെ അതിലുള്ള നക്ഷത്രകൂട്ടങ്ങളുടെ രൂപത്തിനനുസരിച്ച്‌ 12 ഭാഗമായി വിഭജിച്ചതാണ് ചിങ്ങം, കന്നി മുതലായ രാശികള്‍ എന്ന്‌ നമ്മള്‍ മനസ്സിലാക്കിയല്ലോ.

രാശി ചക്രത്തിലെ നക്ഷത്രരാശികള്‍ താഴെപറയുന്നവ ആണ്

  1. ചിങ്ങം
  2. കന്നി
  3. തുലാം
  4. വൃശ്ചികം
  5. ധനു
  6. മകരം
  7. കുംഭം
  8. മീനം
  9. മേടം
  10. ഇടവം
  11. മിഥുനം
  12. കര്‍ക്കടകം

സൂര്യന്‍ ഏത്‌ നക്ഷത്ര രാശിയുടെ ഒപ്പമാണോ ഉള്ളത്‌ ആ മാസത്തെ നമ്മള്‍ ആ രാശിയുടെ പേരിട്ട്‌ വിളിക്കുന്നു. ഈ രാശിചക്രത്തിലെ എല്ലാ നക്ഷത്ര രാശികളും ഒരു പ്രാവശ്യം കറങ്ങി വരാന്‍ സൂര്യന്‍ 365 ദിവസത്തോളം എടുക്കും. ഇതിനെ നമ്മള്‍ ഒരു സൌര വര്‍ഷം എന്ന്‌ വിളിക്കുന്നു. (പലതരം വര്‍ഷങ്ങളെ കുറിച്ച്‌ പിന്നിട്‌ ഒരു പോസ്റ്റില്‍ വിശദീകരിക്കാം)
അതേ പോലെ ചന്ദ്രന്‍ ഈ രാശിചക്രം ഒന്ന്‌ കറങ്ങി വരാന്‍ ഏകദേശം 27 ദിവസം എടുക്കും. (പലതരം മാസങ്ങളെ കുറിച്ച്‌ പിന്നിട്‌ ഒരു പോസ്റ്റില്‍ വിശദീകരിക്കാം) അതനുസരിച്ച്‌ നമ്മുടെ പൂര്‍വ്വികര്‍ രാശിചക്രത്തെ 27 ഭാഗമായി വിഭജിച്ച്‌ ഓരോ ഭാഗത്തിനും ആ ഭാഗത്തുള്ള ഒരു പ്രധാന നക്ഷത്രത്തിന്റെ പേര് കൊടുത്തു. അതാണ് അത്തം, ചിത്തിര, ചോതി, വിശാഖം, മുതലായ 27 നക്ഷത്രങ്ങള്‍‍‍ .

നക്ഷത്രങ്ങള്‍ താഴെ പറയുന്നവ ആണ്.

  1. അശ്വതി
  2. ഭരണി
  3. കാര്‍ത്തിക
  4. രോഹിണി
  5. മകയിരം
  6. തിരുവാതിര
  7. പുണര്‍തം
  8. പൂയം
  9. ആയില്യം
  10. മകം
  11. പൂരം
  12. ഉത്രം
  13. അത്തം
  14. ചിത്തിര
  15. ചോതി
  16. വിശാഖം
  17. അനിഴം
  18. തൃക്കേട്ട
  19. മൂലം
  20. പൂരാടം
  21. ഉത്രാടം
  22. തിരുവോണം
  23. അവിട്ടം
  24. ചതയം
  25. പൂരൂരുട്ടാതി
  26. ഉത്രട്ടാതി
  27. രേവതി

ഒരു വൃത്തത്തിന്റെ ആവൃത്തി 360 ഡിഗ്രി ആണല്ലോ. അപ്പോള്‍ അതിനെ 27 ഭാഗമായി വിഭജിക്കുമ്പോള്‍ ഓരോ ഭാഗത്തിനും 13° 20‘ ആണ് വലിപ്പം എന്ന്‌ കിട്ടുന്നു. അതായത്‌ ഓരോ 13° 20‘ ഭാഗത്തിനും ഒരോ നക്ഷത്രത്തിന്റെ പേര്‍.ചന്ദ്രന്‍ ഓരോ ദിവസവും ഏകദേശം 13 ഡിഗ്രി സഞ്ചരിക്കും. അതായത്‌ ചന്ദ്രന്‍ ഓരോ ദിവസവും ഒരോ നക്ഷത്രഭാഗത്തില്‍ ആയിരിക്കും. അപ്പോള്‍ ആ ദിവസത്തെ നമ്മള്‍ ആ നക്ഷത്ര ഭാഗത്തിന്റെ പേര്‍ ഇട്ട്‌ വിളിക്കുന്നു. ഉദാഹരണത്തിന് ഇന്ന്‌ ചോതി നക്ഷത്രം ആണെന്ന്‌ പറഞ്ഞാല്‍ അതിന്റെ അര്‍ത്ഥം ഇന്ന്‌ ചന്ദ്രന്‍ ചോതി നക്ഷത്രഭാഗത്താണ് എന്നാണ്.

രാശിചക്രത്തിന്റെ നക്ഷത്രങ്ങളായുള്ള വിഭജനം

എന്താണ് ഞാറ്റുവേല?

സൂര്യന്‍ ഒരു ദിവസം ഏകദേശം ഒരു ഡിഗ്രി സഞ്ചരിക്കുന്നു എന്ന്‌ നമ്മള്‍ രാശിചക്രത്തെകുറിച്ചുള്ള പോസ്റ്റില്‍ നിന്ന്‌ മനസ്സിലാക്കിയല്ലോ.അപ്പോള്‍ 13 ഡിഗ്രി സഞ്ചരിക്കാന്‍ ഏകദേശം 13-14 ദിവസം വേണം. അതായത്‌ ഒരു നക്ഷത്രഭാഗം കടന്ന്‌ പോകാന്‍ സൂര്യന് 13-14 ദിവസം വേണം. ഇതാണ് ഞാറ്റുവേല എന്ന പേരില്‍ അറിയപ്പെടുന്നത്‌. ഉദാഹരണത്തിന് ഇപ്പോള്‍ തിരുവാതിര ഞാറ്റുവേല ആണെന്ന്‌ പറഞ്ഞാല്‍ അതിന്റെ അര്‍ത്ഥം സൂര്യന്‍ ഇപ്പോള്‍ തിരുവാതിര നക്ഷത്രഭാഗത്താണ് എന്നാണ്. തിരുവാതിര ഞാറ്റുവേല ഏത്‌ മാസത്തിലാണ് സംഭവിക്കുന്നത്‌ എന്ന്‌ മുകളില്‍ ഉള്ള ചിത്രം നോക്കി കണ്ടുപിടിക്കാമോ എന്ന്‌ നോക്കൂ.
ഒരോ നക്ഷത്രവും (നക്ഷത്രകൂട്ടങ്ങള്‍) ഏത്‌ രാശിയില്‍ ആണെന്നും ഓരോ രാശിയും ഏതൊക്കെ നക്ഷത്രങ്ങള്‍ ചേര്‍ന്നതാണെന്നും ഇതോടൊപ്പം ഉള്ള പട്ടികയില്‍ കൊടുത്തിരിക്കുന്നു.


രാശികളെ നക്ഷത്രങ്ങളായുള്ള വിഭജനം

രാശി ചക്രത്തിലെ നക്ഷത്രരാശികള്‍ഓരോ രാശിയിലേയും നക്ഷത്രങ്ങള്‍
മേടം (Aries) അശ്വതി, ഭരണി, കാര്‍ത്തികയുടെ 1/4‍ ഭാഗം
ഇടവം (Taurus) കാര്‍ത്തികയുടെ 3/4 ഭാഗം‍, രോഹിണി, മകയിരത്തിന്റെ 1/2 ഭാഗം
മിഥുനം (Gemini) മകയിരത്തിന്റെ 1/2 ഭാഗം, തിരുവാതിര, പുണര്‍തത്തിന്റെ 3/4 ഭാഗം
കര്‍ക്കടകം (Cancer) പുണര്‍തത്തിന്റെ 1/4 ഭാഗം, പൂയം, ആയില്യം
ചിങ്ങം (Leo)മകം, പൂരം, ഉത്രത്തിന്റെ 1/4 ഭാഗം
കന്നി (Virgo)ഉത്രത്തിന്റെ 3/4 ഭാഗം, അത്തം, ചിത്തിരയുടെ 1/2 ഭാഗം
തുലാം (Libra)ചിത്തിരയുടെ 1/2 ഭാഗം, ചോതി, വിശാഖത്തിന്റെ 3/4 ഭാഗം
വൃശ്ചികം (Scorpius) വിശാഖത്തിന്റെ 1/4 ഭാഗം, അനിഴം, തൃക്കേട്ട
ധനു (Sagittarius)മൂലം, പൂരാടം, ഉത്രാടത്തിന്റെ 1/4 ഭാഗം
മകരം (Capricornus) ഉത്രാടത്തിന്റെ 3/4 ഭാഗം, തിരുവോണം, അവിട്ടത്തിന്റെ 1/2 ഭാഗം
കുംഭം (Aquarius) അവിട്ടത്തിന്റെ 1/2 ഭാഗം, ചതയം, പൂരൂരുട്ടാതിയുടെ 3/4 ഭാഗം
മീനം (Pisces) പൂരൂരുട്ടാതിയുടെ 1/4 ഭാഗം, ഉത്രട്ടാതി, രേവതി

മുകളില്‍ പറഞ്ഞ നക്ഷത്രങ്ങള്‍ മിക്കവാറും എണ്ണം ഒറ്റനക്ഷത്രങ്ങള്‍ അല്ല എന്ന്‌ പറയട്ടെ. പട്ടികയില്‍ ഉള്ളവയില്‍ തിരുവാതിര, ചോതി, ചിത്തിര, തൃക്കേട്ട എന്നീ നാല് നക്ഷത്രമൊഴിച്ച്‌ ബാക്കിയെല്ലാം അഞ്ചോ ആറോ നക്ഷത്രങ്ങള്‍ ചേര്‍ന്ന നക്ഷത്രകൂട്ടങ്ങള്‍ ആണ്. മാത്രമല്ല രാശികളുടെ പുനര്‍നിര്‍ണ്ണയം ജ്യോതിശ്ശാസ്ത്രയൂണിയന്‍ നടത്തിയപ്പോള്‍ ഈ പല നക്ഷത്രങ്ങളുടേയും സ്ഥാനം രാശിചക്രത്തിന് പുറത്തുള്ള നക്ഷത്രരാശിയില്‍ ആയി.

ആര്‍ക്കെങ്കിലും താല്പര്യം ഉണ്ടെങ്കില്‍ ഓരോ നക്ഷത്രത്തേയും അതത്‌ നക്ഷത്രരാശിയില്‍ ചൂണ്ടി കാണിക്കുന്ന ഒരു പോസ്റ്റ് ഇടാം.

നക്ഷത്ര രാശികളെ ഇനിയും ചെറുതായി നവാശങ്ങളായും പാദങ്ങളായും വിഭജിക്കാം. അതിനെ കുറിച്ച്‌ കൂടുതല്‍ കാര്യങ്ങള്‍ ഉമേഷ്ജിയുടെ പഞ്ചാഗം തിയറിയില്‍ പറയുന്നുണ്ട്‌.

നക്ഷത്ര രാശികളിലെ നക്ഷത്രങ്ങളെ നാമകരണം ചെയ്യുന്നത്‌ എങ്ങനെയാണെന്ന്‌ താമസിയാതെ ഒരു പോസ്റ്റിടാം. (ഈശ്വരാ ഇതെല്ലാം കൂടി എപ്പോഴാണാവോ പോസ്റ്റാന്‍ പറ്റുന്നത്‌‌ :).)

Thursday, August 17, 2006

രാഹുവും കേതുവും എന്താണ്?

പ്ലൂട്ടോയ്ക്ക്‌ ഗ്രഹപ്പിഴ എന്ന പോസ്റ്റില്‍ രാഹുവും കേതുവും ഗ്രഹങ്ങളല്ല എന്ന്‌ പറഞ്ഞിരുന്നുല്ലോ. എന്താണ് രാഹു കേതുക്കള്‍ എന്ന്‌ ഈ പോസ്റ്റില്‍ വിശദീകരിച്ചിരിക്കുന്നു.

രാശിചക്രത്തിലൂടെ‍ സൂര്യന്‍ സഞ്ചരിക്കുന്ന പാത (സൂര്യപഥം) ഖഗോളം നക്ഷത്രരാശികള്‍ എന്ന പോസ്റ്റില്‍ ഉള്ള ചിത്രത്തില്‍ കാണിച്ചിരുന്നുവല്ലോ. ചന്ദ്രനും രാശിചക്രത്തിലൂടെയാണ് ഭൂമിയെ വലം വയ്ക്കുന്നത്‌ എങ്കിലും സൂര്യന്‍ സഞ്ചരിക്കുന്ന അതേ തലത്തിലൂടെ (Plane ) അല്ല ചന്ദ്രന്‍ ഭൂമിയെ വലം വയ്ക്കുന്നത്‌. സൂര്യപഥവും ചന്ദ്രപഥവും തമ്മില്‍ ഏകദേശം 5 ഡിഗ്രിയുടെ വ്യത്യാസം ഉണ്ട്‌. ഇതു കാരണം രണ്ട്‌ ബിന്ദുക്കളില്‍ മാത്രമേ സൂര്യപഥവും ചന്ദ്രപഥവും തമ്മില്‍ കൂട്ടിമുട്ടുകയുള്ളൂ. ഈ ബിന്ദുക്കളെയാണ് നമ്മള്‍ രാഹുവും കേതുവും എന്ന്‌ വിളിക്കുന്നത്‌. ചിത്രം ശ്രദ്ധിക്കുക. ‍



രാഹുകേതുക്കള്‍


ചന്ദ്രന്‍ തെക്ക്‌ നിന്ന്‌ വടക്കോട്ട്‌ സൂര്യപഥത്തെ മുറിച്ച്‌ കടക്കുന്ന ബിന്ദുവിനെ നമ്മുടെ പൂര്‍വ്വികര്‍ രാഹു എന്ന്‌ വിളിച്ചു. ഇംഗ്ലീഷില്‍ Ascending Node . ഇതിന്റെ നേരെ എതിര്‍വശത്ത്‌ ചന്ദ്രന്‍ വടക്ക്‌ നിന്ന്‌ തെക്കോട്ട് സൂര്യപഥത്തെ മുറിച്ച്‌ കടക്കുന്ന ബിന്ദുവിനെ നമ്മുടെ പൂര്‍വ്വികര്‍ കേതു എന്ന്‌ വിളിച്ചു. ഇംഗ്ലീഷില്‍ Descending Node.

വിഷുവങ്ങളുടെ പുരസ്സരണം എന്ന പോസ്റ്റില്‍ സൂര്യനും ചന്ദ്രനും ഭൂമിക്ക്‌ മേലെ നടത്തുന്ന ഗുരുത്വ വലിവ്‌ മൂലം ഭൂമിയുടെ അച്ചുതണ്ട്‌ പുരസ്സരണം ചെയ്യുന്നതായും തന്മൂലം വിഷുവങ്ങളുടെ സ്ഥാനം മാറുന്നതായും നമ്മള്‍ കണ്ടുവല്ലോ. ഏതാണ്ട്‌ സമാനമായ ഒരു കറക്കം ചന്ദ്രന്റെ പഥവും കറങ്ങുണ്ട്‌. (പക്ഷെ ഇത്‌ പുരസ്സരണം മൂലം അല്ല. അതിനെകുറിച്ച്‌ അടുത്തപോസ്റ്റില്‍). ഈ കറക്കത്തിന് Regression of Moon's Orbit എന്ന്‌ പറയുന്നു. ഇത്തരം ഒരു കറക്കം പൂര്‍ത്തിയാകാന്‍ ചന്ദ്രന്റെ പഥം 18.6 വര്‍ഷം എടുക്കും. അതായത്‌ ഒരു വര്‍ഷം ഏതാണ്ട്‌ 19 ഡിഗ്രി കറങ്ങും. ഈ ഒരു കാരണം കൊണ്ട്‌ ആയിരിക്കാം നമ്മുടെ പൂര്‍വ്വികര്‍ ഈ ബിന്ദുക്കളെ ഗ്രഹങ്ങളായി കരുതിയത്‌.

ഈ ബിന്ദുക്കളും ചന്ദ്രപഥത്തിന്റെ 5 ഡിഗ്രി ചെരിവും വളരെയധികം പ്രാധാന്യം ഉള്ളതാണ്. സൂര്യഗ്രഹണവും ചന്ദ്രഗ്രഹണവും എല്ലാം ഈ ബിന്ദുക്കളെ ആശ്രയിച്ചാണ് സംഭവിക്കുന്നത്. അതെല്ലാം തുടര്‍ന്നുള്ള പോസ്റ്റുകളില്‍ വിശദീകരിക്കാം.

Tuesday, August 15, 2006

പ്ലൂട്ടോയ്ക്ക്‌ ഗ്രഹപ്പിഴ

അന്താരാഷ്ട്ര ജ്യോതിശാസ്ത്രയൂണിയന്റെ (International astronomical Union (IAU) ) 26-ആം അന്താരാഷ്ട്ര സമ്മേളനം ഇന്ന്‌ (ആഗസ്റ്റ്‌ 15) മുതല്‍ ആഗസ്റ്റ്‌ 25 വരെ ചെക്ക്‌ റിപബ്ലിക്കിന്റെ തലസ്‌ഥാനമായ പ്രാഗില്‍ നടക്കുന്നു. മറ്റ്‌ പ്രധാന വിഷയങ്ങളോടൊപ്പം ഗ്രഹങ്ങള്‍ക്ക്‌ ഒരു നിര്‍വചനം കൊടുക്കുക എന്നതാണ് സമ്മേളനത്തിലെ ഒരു പ്രധാന അജണ്ട. ഇതോടുകൂടി സൌരയൂഥത്തിലെ ഗ്രഹങ്ങളുടെ എണ്ണം ഒന്നുകില്‍ എട്ടായി ചുരുങ്ങും. അല്ലെങ്കില്‍ പത്തായി ഉയരും. നമ്മള്‍ പഠിച്ചതൊക്കെ ഒന്ന്‌ തിരുത്തണം എന്ന്‌ സാരം.
നമ്മള്‍ക്ക്‌ ഇന്ന്‌ അറിയുന്ന സൌരയൂഥത്തിലെ നവഗ്രഹങ്ങള്‍ താഴെ പറയുന്നവ ആണ്.
1. Mercury
2. Venus
3. Earth
4. Mars
5. Jupiter
6. Saturn
7. Uranus
8. Neptune
9. Pluto

ഇതിനു പുറമെ കഴിഞ്ഞ വര്‍ഷം ജൂലായില്‍ (2005 ജൂലായ്) California Institute of Technology യിലെ ജ്യോതിശാസ്ത്രഞ്ജനായ മൈക്കല്‍ ബ്രൌണ്‍ പ്ലൂട്ടോയ്ക്ക്‌ അപ്പുറം വേറൊരു ഗ്രഹത്തേകൂടി കണ്ടെത്തിയതായി പ്രഖ്യാപിച്ചു. Xena എന്നാണ് മൈക്കല്‍ ബ്രൌണ്‍ അതിന് കൊടുത്ത പേര്. ജ്യോതിശാസ്ത്രഞ്ജന്മാര്‍ അതിന് 2003 UB313 എന്നാണ് ഇപ്പോള്‍ കൊടുത്തിരിക്കുന്ന താല്‍ക്കാലിക നാമം. (ഖഗോള വസ്തുക്കളെ എങ്ങനെയാണ് നാമകരണം ചെയ്യുന്നത്‌ എന്ന്‌ മറ്റൊരു പോസ്റ്റില്‍ വിവരിക്കാം.) പ്ലൂട്ടോയെ പോലെ ഈ പത്താമനും Kuiper Belt ലെ ഒരു അംഗമാണ്.

കുറിപ്പ്‌: Kuiper Belt നെപ്‌‌റ്റ്യൂണിനപ്പുറം വ്യാപിച്ച് കിടക്കുന്ന സൌരയൂഥത്തിലെ ഒരു ഭാഗമാണ്. ധൂമ കേതുക്കളും, കൂറ്റന്‍ ഉല്‍ക്കകളും, വാതക പടലങ്ങളും ഒക്കെ നിറഞ്ഞ Kuiper Belt സൌരയൂഥത്തിന്റെ അതിര്‍ത്തിയാണെന്ന്‌ പറയപ്പെടുന്നു. ഹാലി വാല്‍നക്ഷത്രം ഒക്കെ Kuiper Belt ന്റെ ഭാഗം ആണെന്ന്‌ പറയപ്പെടുന്നു. (Kuiper Belt നെ കുറിച്ച്‌ മറ്റൊരിക്കല്‍ വിശദീകരിക്കാം. ഇപ്പോള്‍ കൂടുതല്‍ അറിയാന്‍ താല്പര്യം ഉള്ളവര്‍ വിക്കിയിലെ ഈ ലേഖനം കാണുക. ‌ ‌

മൈക്കല്‍ ബ്രൌണ്‍ കണ്ടെത്തിയിരിക്കുന്ന ഈ Kuiper Belt ലെ വസ്തുവിന് പ്ലൂട്ടോയേക്കാള്‍ എതാണ്ട്‌ നൂറ്‌‌ കീലോമീറ്ററില്‍‍ അധികം വ്യാസം ഉണ്ട്‌. ചില ജ്യോതിശാസ്ത്രഞ്ജന്മാരുടെ അഭിപ്രായം പ്ലൂട്ടോയെ ഒരു ഗ്രഹമായി കണക്കാക്കാം എങ്കില്‍ തീര്‍ച്ചയായും ഇതിനേയും കണക്കാക്കാം എന്നാണ്.

തര്‍ക്കം മുറുകിയതോട്‌‌ കൂടി അന്താരാഷ്ട്ര ജ്യോതിശാസ്ത്രയൂണിയന്‍ സൌരയൂഥത്തിലെ ഒരു വസ്തുവിനെ ഒരു ഗ്രഹമായി പരിഗണിക്കണം എങ്കില്‍ അത്‌ എന്തൊക്കെ മാനദണ്ഡങ്ങള്‍ പലിക്കണം എന്ന്‌ ചര്‍ച്ച ചെയ്ത്‌ തീരുമാനിക്കാന്‍ ഉള്ള യോജിപ്പിലെത്തി. ഈ സമ്മേളനത്തില്‍ ഒരു ഗ്രഹം എന്താണ് എന്നതിന് ശാസ്ത്രഞ്ജ്ന്മാര്‍ വ്യക്തമായ ഒരു നിര്‍വചനം കൊടുക്കും. അതോടു കൂടി ഒന്നുകില്‍ പ്ലൂട്ടോ ഗ്രഹങ്ങളുടെ പട്ടികയില്‍ നിന്ന്‌ പുറത്താകും. അല്ലെങ്കില്‍ നമുക്ക്‌ പത്താമതൊരു ഗ്രഹം കൂടി ലഭിക്കും. ഇതില്‍ കൂടുതലും ആദ്യപറഞ്ഞതിനാണ് സാധ്യത. അതായത്‌ പ്ലൂട്ടോ ഗ്രഹങ്ങളുടെ പട്ടികയില്‍ നിന്ന്‌ പുറത്താകും. അതായത്‌ നമ്മള്‍ക്ക്‌ ഇനി മുതല്‍ അഷ്ടഗ്രഹങ്ങള്‍ എന്ന്‌ തിരുത്തി പറയേണ്ടി വരുമെന്ന്‌ സാരം.

കൂടുതല്‍ വിവരത്തിന് ഈ ലിങ്കുകള്‍ സന്ദര്‍ശിക്കുക.

1. ഇപ്പോള്‍ നടക്കുന്ന സമ്മേളനത്തിന്റെ വെബ്‌സൈറ്റ്‌
2. അന്താരാഷ്ട്ര ജ്യോതിശാസ്ത്രയൂണിയന്റെ വെബ്‌സൈറ്റ്‌
3. മൈക്കല്‍ ബ്രൌണിന്റെ വെബ്‌സൈറ്റ്‌
4. ഇതിനെപറ്റി ഇന്ത്യന്‍ എക്സ്പ്രസ്സില്‍ വന്ന വാര്‍ത്ത
5. ഇതിനെപറ്റി കേരളാ കൌമദിയില്‍ വന്ന വാര്‍ത്ത (വക്കാരി, ഈ വിവരത്തിന് നന്ദി)

അനുബന്ധം

ജ്യോതിഷത്തിലെ നവഗ്രഹങ്ങളും ജ്യോതിശാസ്ത്രത്തിലെ നവഗ്രഹങ്ങളും തമ്മില്‍ മാറിപ്പോകരുത്‌.
ജ്യോതിഷത്തിലെ നവ ഗ്രഹങ്ങള്‍ താഴെ പറയുന്നവ ആണ്‌.
1. സൂര്യന്‍ (Sun)
2. ചന്ദ്രന്‍ (Moon)
3. ചൊവ്വ (Mars)
4. ബുധന്‍ (Mercury)
5. ഗുരു (Jupiter)
6. ശുക്രന്‍ (Venus)
7. ശനി (Saturn)
8. രാഹു
9. കേതു
ജ്യോതിഷക്കാരുടെ പട്ടികയിലുള്ള സൂര്യന്‍, ചന്ദ്രന്‍ എന്നിവ ഇപ്പോള്‍ ഗ്രഹങ്ങള്‍ അല്ല എന്ന്‌ നമുക്കറിയാം. രാഹുവും കേതുവും സൂര്യന്റേയും ചന്ദ്രന്റേയും പഥങ്ങള്‍ തമ്മില്‍ കൂട്ടി മുട്ടുന്ന രണ്ട്‌ ബിന്ദുക്കള്‍ മാത്രമാണ്‌. അങ്ങനെ രണ്ട്‌ ഗ്രഹങ്ങള്‍ യഥാര്‍ത്ഥത്തില്‍ ഇല്ല. രാഹുവും കേതുവും എന്താണെന്ന്‌ മനസ്സിലാക്കാന്‍ ഈ പോസ്റ്റ് വായിക്കൂ.

അതിനാല്‍ ഇന്ന്‌ നമുക്കറിയുന്ന നവഗ്രഹങ്ങളും ജ്യോതിഷത്തിലെ നവഗ്രഹങ്ങള്‍ ഒന്നല്ല.
അതിനാല്‍ തന്നെ ‍ അന്താരാഷ്ട്ര ജ്യോതിശാസ്ത്രയൂണിയന്റെ തീരുമാനം എന്തുതന്നെ ആയാലും അത് ജ്യോതിഷവുമായി ബന്ധപ്പെടുത്തേണ്ട കാര്യമില്ല. ഇനി ഒരു 10 ഗ്രഹങ്ങള്‍ കൂടി അധികം കണ്ടു പിടിച്ചാലും അതിനെ ജ്യോതിഷവുമായി ബന്ധപ്പെടുത്തേണ്ട ആവശ്യമില്ല.

Friday, August 11, 2006

അയനാന്തങ്ങള്‍

വിഷുങ്ങളെകുറിച്ചുള്ള പോസ്റ്റില്‍ നിന്ന്‌ ക്രാന്തിവൃത്തം ഖഗോള വൃത്തവുമായി കൂടിമുട്ടുന്ന ബിന്ദുക്കളാണ് വിഷുവങ്ങള്‍ എന്ന്‌ മന‍സ്സിലാക്കിയല്ലോ. അത്‌ ക്രാന്തിവൃത്തത്തിന്റെ നേരെ എതിര്‍ വശത്തുള്ള രണ്ട്‌ ബിന്ദുക്കളാണ് എന്നും മനസ്സിലാക്കി. മേഷാദി മാര്‍ച്ച്‌ 21-നും തുലാദി സെപ്റ്റമ്പര്‍ 23-നും ആണ്‌ സംഭവിക്കുന്നത്‌.


ഇതേ പോലെ തന്നെ പ്രാധാന്യം ഉള്ള രണ്ട്‌ ബിന്ദുക്കളാണ് ദക്ഷിണ അയനാന്തവും ഉത്തര അയനാന്തവും. സെപ്റ്റമ്പര്‍ 23-നു തുലാ വിഷുവത്തില്‍ (Autumnal Equinox) നിന്ന്‌ സൂര്യന്‍ തെക്കോട്ട്‌ സഞ്ചരിച്ച്‌ ഡിസംബര്‍ 22-ന് ഏറ്റവും തെക്കുഭാഗത്തെത്തുന്നു. ഈ ബിന്ദുവിനെയാണ് ദക്ഷിണ അയനാന്തം (Winter Solistic) എന്ന്‌ പറയുന്നത്‌. പിന്നീട്‌ അവിടെ നിന്ന്‌ വടക്കോട്ട്‌ സഞ്ചരിച്ച്‌ മാര്‍ച്ച്‌ 21-നു മഹാവിഷുവത്തില്‍‍ (മേഷാദി) (Vernal Equinox) എത്തുന്നു. പിന്നീട്‌ അവിടെ നിന്ന്‌ യാത്ര തുടര്‍ന്ന്‌ ജൂണ്‍ 22-നു ഏറ്റവും വടക്ക്‌ ഭാഗത്തുള്ള ബിന്ദുവില്‍ എത്തുന്നു. ഈ ബിന്ദുവിനെയാണ് ഉത്തര അയനാന്തം (Summer Solistic) എന്ന്‌ പറയുന്നത്‌. കൂടുതല്‍ വിവരത്തിന് ചിത്രം കാണുക.

ഉത്തര ദക്ഷിണ അയനാന്തങ്ങള്‍

പുരസ്സരണം എന്താണെന്നും അത്‌ മൂലം വിഷുവങ്ങള്‍ക്ക്‌ വര്‍ഷംതോറും സ്ഥാനചലനം ഉണ്ടാകുന്നതും ആയി നമ്മള്‍ കഴിഞ്ഞ ലേഖനത്തില്‍ നിന്ന്‌ മനസ്സിലാക്കിയല്ലോ. ചിത്രത്തില്‍ നിന്ന്‌ മഹാവിഷുവം, തുലാ വിഷുവം‍, ഉത്തര അയനാന്തം, ദക്ഷിണ അയനാന്തം ഇവയെല്ലാം ക്രാന്തിവൃത്തത്തിലെ വിവിധ ബിന്ദുക്കളാണെന്നും‌ മനസ്സിലാക്കാമല്ലോ. പുരസ്സരണം കാരണം ഈ ബിന്ദുക്കള്‍ എല്ലാം ഒരു വര്‍ഷം 50.26'' ആര്‍ക് സെക്കന്റ്‌ വീതം നീങ്ങി കൊണ്ടിരിക്കുന്നു. പുരസ്സരണം കാരണം ക്രാന്തിവൃത്തതിലെ ബിന്ദുക്കള്‍ക്ക്‌ സം‍ഭവിക്കുന്ന സ്ഥാനചലനത്തിന് അയന ചലനം എന്ന്‌ പറയുന്നു.

കുറിപ്പ്‌: ഋതുക്കളെ‍ കുറിച്ച്‌ പറയുമ്പോള്‍ ഈ ബിന്ദുക്കളെ കുറിച്ച്‌ പരാമര്‍ശിക്കേണ്ടി വരും. അപ്പോള്‍ അത്‌ വിശദീകരിക്കുന്നത് ഒഴിവാക്കാനാണ് ഈ പോസ്റ്റ്.

കടപ്പാട്‌: ടെബ്ലേറ്റില്‍ ചില മാറ്റങ്ങള്‍ വരുത്തുന്നതിന് സഹായിച്ച ടെബ്ലേറ്റ്‌ ചേട്ടന് (ശ്രീജിത്ത്) പ്രത്യേക നന്ദി.

Monday, August 07, 2006

വിഷുവങ്ങളുടെ പുരസ്സരണം (Precession of the Equinoxes)

എന്താണ് പുരസ്സരണം?
വിഷുവങ്ങള്‍ (Equinoxes)എന്താണ് എന്ന്‌ കഴിഞ്ഞ ലേഖനത്തില്‍ നിന്ന്‌ മനസ്സിലാക്കിയല്ലോ. വിഷുവങ്ങളുടെ പുരസ്സര‍ണത്തെ കുറിച്ചും പുരസ്സരണം കാരണം വിഷുവങ്ങളുടെ സ്ഥാനത്തിന് വര്‍ഷം തോറും 50.26'' ആര്‍ക് സെക്കന്റ്‌ മാറ്റം ഉണ്ടാകുന്നു എന്നും‌ കഴിഞ്ഞ ലേഖനത്തില്‍ സൂച്ചിപ്പിച്ചിരുന്നുവല്ലോ. എന്താണ് പുരസ്സരണം എന്നും എന്തൊക്കെയാണ് അതിന്റെ അനന്തര ഫലങ്ങള്‍ എന്നും ഈ ലേഖനത്തില്‍ വിവരിച്ചിരിക്കുന്നു.

കുറിപ്പ്‌:
ആര്‍ക് സെക്കന്റ്‌ കോണിന്റെ അളവാണ്. അതിന് സമയവുമായി ബന്ധമില്ല. ഒരു ഡിഗ്രിയെ 60 ഭാഗമായി തിരിക്കുമ്പോള്‍ ലഭിക്കുന്ന ഒരു ഭാഗത്തിന് ഒരു മിനിട്ട്‌ എന്ന്‌ പറയുന്നു. ഈ ഒരു മിനിട്ടിനെ 60 ഭാഗമായി ഭാഗിക്കുമ്പോള്‍ ലഭിക്കുന്ന ഒരു ഭാഗത്തിനാണ് ഒരു ആര്‍ക് സെക്കന്റ്‌ എന്ന് പറയുന്നത്‌.

ഭൂമിയുടെ ഭൂമധ്യരേഖാ വ്യാസം (Equatorial Diameter) അതിന്റെ തെക്ക്‌ വടക്ക്‌ ധ്രുവങ്ങളില്‍ നിന്നുള്ള വ്യാസത്തേക്കാള്‍ അല്പം കൂടുതല്‍ ആണ്. (ഭൂമി ആരം(radius) തുല്യമായ ഒരു ഗോളം അല്ല എന്ന്‌ അര്‍ത്ഥം.) ഭൂമധ്യരേഖാരേഖാ വ്യാസം തെക്ക്‌ വടക്ക്‌ ധ്രുവങ്ങളില്‍ നിന്നുള്ള വ്യാസത്തേക്കാള്‍ ഏകദേശം 43 കിലോമീറ്റര്‍ അധികമാണ്. അതായത്‌ ഭൂമധ്യ ഭാഗം കുറച്ച്‌ വീര്‍ത്താണ് ഇരിക്കുന്നത്‌ എന്ന്‌ സാരം. ഈ വീര്‍ത്ത ഭാഗത്ത്‌ സൂര്യനും ചന്ദ്രനും ചെലുത്തുന്ന ഗുരുത്വ ബലം മൂലം ഭൂമിയുടെ അച്ചുതണ്ടിന്റെ വിന്യാസത്തിന് ക്രമേണ മാറ്റം വന്ന്‌ കൊണ്ടിരിക്കുന്നു.

സൂര്യ ചന്ദ്രന്മാരുടെ ഭൂമിക്കു മേലെ ഉള്ള ഗുരുത്വ വലിവ്‌

സൂര്യചന്ദ്രന്മാരുടെ ഈ ഗുരുത്വ ആകര്‍ഷണം മൂലം ഭൂമി ഒരു കറങ്ങുന്ന പമ്പരത്തെ പോലെ പെരുമാറുന്നു. താഴെ കാണുന്ന ചിത്രം ശ്രദ്ധിയ്ക്കുക്ക.

പമ്പരത്തിന്റെ അച്ചുതണ്ടിന്റെ പുരസ്സരണം

പമ്പരം കറങ്ങുന്നില്ലെങ്കില്‍ ഗുരുത്വബലം അതിനെ താഴേക്ക്‌ വലിച്ചിടും. പമ്പരം കറങ്ങുമ്പോള്‍ അതിന്റെ സ്വാഭാവിക കറക്കത്തിനു പുറമേ ഗുരുത്വബലം മൂലം അതിന്റെ അച്ചുതണ്ട്‌ അന്തരീക്ഷത്തില്‍ ഒരു വൃത്തം രചിച്ച് കൊണ്ട്‌ കറങ്ങും. ഈ രണ്ടാമത്‌ പറഞ്ഞ കറക്കത്തിനാണ് പുരസ്സരണം അഥവാ Precission എന്ന്‌ പറയുന്നത്‌. പുരസ്സരണം മൂലം ഭൂമിയുടെ അച്ചുതണ്ട്‌ ബഹിരാകാശത്ത്‌ ഒരു വൃത്തവും വരച്ച്‌ കൊണ്ട്‌ കറങ്ങുന്നു. ഈ കറക്കത്തിനിടയിലും അച്ചുതണ്ട്‌ ലംബത്തില്‍ നിന്ന്‌ 23.5 ഡിഗ്രി (ഇത്‌ സ്ഥിരമാണ്) ചരിഞ്ഞു കൊണ്ട്‌ തന്നെയാണ് കറങ്ങുന്നത്‌. ഒരു വര്‍ഷം ഏകദേശം 50.26 ആര്‍ക്ക് സെക്കന്റ്‌ ആണ് ഭൂമിയുടെ അച്ചുതണ്ട് ഈ പുരസ്സര കറക്കത്തിലൂടെ സഞ്ചരിക്കുന്നത്‌. അതിനാല്‍ ഭൂമിയുടെ അച്ചുതണ്ടിന് ഒരു പുരസ്സരകറക്കം പൂര്‍ത്തിയാക്കാന്‍ 26,000 വര്‍ഷങ്ങള്‍ വേണം.

ഭൌമ അച്ചുതണ്ടിന്റെ പുരസ്സരണം

പുരസ്സര കറക്കത്തിന്റെ ഫലങ്ങള്‍

ഇനി ഈ കറക്കത്തിന്റെ ഫലങ്ങള്‍ എന്തൊക്കെ ആണെന്ന്‌ നോക്കാം.

1. വിഷുവങ്ങള്‍ക്കുണ്ടാകുന്ന സ്ഥാനചലനം

ഭൂമധ്യ രേഖ ഖഗോളവുമായി ഛേദിക്കുമ്പോള്‍ ലഭിക്കുന്ന മഹാവൃത്തമാണ് ഘടികാമാണ്ഡലം (Celestial equator) എന്ന്‌ കഴിഞ്ഞ ലേഖത്തില്‍ പറഞ്ഞിരുന്നുവല്ലോ. പുരസ്സരണം കാരണം ഈ വൃത്തത്തിന്റെ വിന്യാസത്തില്‍ മാറ്റം വരും. അപ്പോള്‍ അതിന്റെ അര്‍ഥം ഈ വൃത്തം ക്രാന്തിവൃത്തവുമായി (ecliptic) മുട്ടുന്ന ബിന്ദുക്കള്‍ക്കും മാറ്റം ഉണ്ടാകും എന്നാണല്ലോ. ഘടികാമാണ്ഡലം ക്രാന്തിവൃത്തവുമായി കൂട്ടിമുട്ടുന്ന ബിന്ദുക്കളാണ് വിഷുവങ്ങള്‍ (Equinox) എന്ന്‌ നമ്മള്‍ കഴിഞ്ഞ ലേഖനത്തില്‍ നിന്ന്‌ മനസ്സിലാക്കി. അപ്പോള്‍ വിഷുവങ്ങള്‍ അതിന്റെ സ്ഥാനം ക്രമേണ മാറുന്നു എന്ന്‌ അര്‍ത്ഥം. ഒരു വര്‍ഷം ഏതാണ്ട്‌ 50.26'' ആര്‍ക് സെക്കന്റ്‌ വ്യത്യാസം ഉണ്ടാകും. ഇക്കാരണം കൊണ്ടാണ് ഭൂമിയുടെ അച്ചു തണ്ടിനുണ്ടാകുന്ന പുരസ്സരണത്തെ നമ്മള്‍ വിഷുവ പുരസ്സരണം എന്ന്‌ പറയുന്നത്‌. (യഥാര്‍ത്ഥത്തില്‍ ഇത്‌ അച്ചു തണ്ടിനുണ്ടാകുന്ന പുരസ്സരണം ആണ്).

അച്ചുതണ്ടിന്റെ പുരസ്സരണം

വിഷുവങ്ങളുടെ ഈ പുരസ്സരണം ആദ്യമായി മനസ്സിലാക്കിയത്‌ ഗ്രീക്ക്‌ ജ്യോതിശാസ്ത്രഞ്ജനായ ഹിപ്പാര്‍ക്കസ്‌ ആണ് (BC രണ്ടാം നൂറ്റാണ്ടില്‍). 2000 വര്‍ഷങ്ങള്‍ക്ക്‌ മുന്‍പ്‌ മേഷാദി (Vernal Equinox) മേടം രാശിയില്‍ ആയിരുന്നു. ഇപ്പോള്‍ മീനത്തില്‍ ആണ്. A.D 2600 നോടടുത്ത്‌ അത്‌ കുംഭത്തിലേക്ക്‌ മാറും.

2. ധ്രുവ നക്ഷത്രത്തിനുണ്ടാകുന്ന സ്ഥാനചലനം

പുരസ്സരണം കാരണം വിഷുവങ്ങള്‍ക്ക്‌ മാത്രമല്ല ധ്രുവനക്ഷത്രത്തിനും വ്യത്യാസം ഉണ്ടാകുന്നുണ്ട്‌.
ഭൂമിയുടെ അച്ചുതണ്ട്‌ ഏത്‌ നക്ഷത്രത്തിന് നേരെയാണോ ചൂണ്ടിയിരിക്കുന്നത്‌ അതിനെയാണല്ലോ നമ്മള്‍ ധ്രുവനക്ഷത്രം എന്ന്‌ പറയുന്നത്‌. അപ്പോള്‍ അച്ചുതണ്ട്‌ പുരസ്സരണം ചെയ്യുമ്പോള്‍ ധ്രുവനക്ഷത്രത്തിനും വ്യത്യാസം വരും. ഇപ്പോള്‍ അച്ചുതണ്ട്‌ Ursa Minor (ലഘു ബാലു) എന്ന നക്ഷത്രരാശിയില്‍ ഉള്ള പോളാരിസ് (Polaris) എന്ന നക്ഷത്രത്തിന് നേരെയാണ് ഇരിക്കുന്നത്‌. അതിനാല്‍ അതാണ് ഇപ്പോഴത്തെ ധ്രുവനക്ഷത്രം. BC 3000ത്തില്‍ അത്‌ Draco (വ്യാളം) എന്ന നക്ഷത്രരാശിയില്‍ ഉള്ള Thuban എന്ന നക്ഷത്രത്തെ ആയിരുന്നു അച്ചുതണ്ട്‌ അഭിമുഖീകരിച്ചിരുന്നത്‌. അന്ന്‌ അതായിരുന്നു ധ്രുവ നക്ഷത്രം. AD 7500 നോടടുത്ത്‌ Cepheus (കൈകവസ്‌ ) എന്ന നക്ഷത്രരാശിയില്‍ ഉള്ള Aderamin എന്ന നക്ഷത്രം ആയിരിക്കും ധ്രുവനക്ഷത്രം.

താഴെ കാണുന്ന പടത്തില്‍ അച്ചുതണ്ടിന്റെ പുരസ്സരണം കാരണം ധ്രുവനക്ഷത്രത്തിനുണ്ടാകുന്ന മാറ്റം ചിത്രീകരിച്ചിരിക്കുന്നു.

ധ്രുവ നക്ഷത്രത്തിനുണ്ടാകുന്ന സ്ഥാനചലനം

ധ്രുവനക്ഷത്രത്തെകുറിച്ച്‌ കുറച്ച്‌ കാര്യങ്ങള്‍ സന്തോഷേട്ടന്റെ ഈ ലേഖനത്തില്‍ നിന്ന്‌ വായിക്കാം.

Wednesday, August 02, 2006

വിഷുവങ്ങള്‍‍

ഖഗോളവും നക്ഷത്രരാശികളും രാശിചക്രവും ഒക്കെ എന്താണെന്ന്‌ കഴിഞ്ഞ രണ്ട്‌ ലേഖനങ്ങളിലൂടെ നമ്മള്‍ മനസ്സിലാക്കി. ഈ ലേഖനത്തില്‍ വിഷുവങ്ങള്‍‍ എന്താണെന്ന്‌ നമുക്ക്‌ മനസ്സിലാക്കാം.

ഭൂമധ്യരേഖ ഖഗോളത്തെ ഛേദിക്കുമ്പോള്‍ ലഭിക്കുന്ന മഹാവൃത്തത്തിന്‌ ഘടികാമണ്ഡലം (celestial equator) അഥവാ ഖഗോളമധ്യ രേഖ എന്ന്‌ പറയുന്നു. രാശിചക്രത്തിലൂടെ സൂര്യന്‍ സഞ്ചരിക്കുന്ന പാതയെ ക്രാന്തിവ്രത്തം (ecliptic) എന്നും പറയുന്നു.

ഭൂമിയുടെ അച്ചുതണ്ട്‌ 23.5° ചെരിഞ്ഞാണ്‌ കറങ്ങുന്നത്‌ എന്ന്‌ നമ്മള്‍ക്ക്‌ അറിയാമല്ലോ. അപ്പോള്‍ ഘടികാമണ്ഡലവും ക്രാന്തിവൃത്തവും തമ്മില്‍ 23.5° യുടെ ചരിവ്‌ ഉണ്ട്‌. ഈ രണ്ട്‌ മഹാവൃത്തങ്ങള്‍ തമ്മില്‍ രണ്ട്‌ സ്ഥലത്ത്‌ കൂട്ടിമുട്ടുന്നുണ്ട്‌. ഈ രണ്ട്‌ ബിന്ദുക്കളെ വിഷുവം എന്ന്‍ വിളിക്കുന്നു. ഇംഗ്ലീഷില്‍ Equinox എന്ന്‍ വിളിക്കുന്നു.സൂര്യന്‍ അതിന്റെ സഞ്ചാരമധ്യേ തെക്ക്‌ നിന്ന്‌ വടക്കോട്ട്‌ ഘടികാമണ്ഡലത്തെ മുറിച്ച്‌ കിടക്കുന്ന ബിന്ദുവിനെ നമ്മള്‍ മഹാവിഷുവം അഥവാ മേഷാദി (Vernal Equinox) എന്ന് വിളിക്കുന്നു. അതേ പോലെ സൂര്യന്‍ വടക്ക്‌ നിന്ന്‌ തെക്കോട്ട്‌ ഘടികാമണ്ഡലത്തെ മുറിച്ചു കിടക്കുന്ന ബിന്ദുവിനെ നമ്മള്‍ തുലാവിഷുവം അഥവാ തുലാദി (Autumnal Equinox) എന്ന്‌ വിളിക്കുന്നു. മേഷാദി മാര്‍ച്ച്‌ 21-നും തുലാദി സെപ്റ്റമ്പര്‍ 23-നും ആണ്‌ സംഭവിക്കുന്നത്‌.

മുകളില്‍ വിവരിച്ചതിന്റെ രേഖാചിത്രം താഴെ കൊടുക്കുന്നു.


വിഷുവങ്ങളുടെ രേഖാചിത്രം

Equinox എന്ന വാക്കിന്റെ മൂല പദം ലാറ്റിന്‍ ഭാഷയില്‍ നിന്നുള്ള ഒരു വാക്കാണ്‌. Equal night എന്നാണ്‌ അതിന്റെ അര്‍ത്ഥം. സൂര്യന്‍ ഈ രണ്ട്‌ ബിന്ദുക്കളില്‍ ഉള്ളപ്പോള്‍ രാത്രിയും പകലും തുല്യമായിരിക്കും എന്നര്‍ത്ഥം.

സൂര്യചന്ദ്രന്മാര്‍ ഭൂമിയില്‍ ചെലുത്തുന്ന ഗുരുത്വ ആകര്‍ഷണം മൂലം ഭൂമിയുടെ അച്ചുതണ്ട്‌ അതിന്റെ സ്വാഭാവികമായുള്ള കറക്കത്തിന്‌ പുറമേ 26,000 വര്‍ഷം കൊണ്ട്‌ പൂര്‍ത്തിയാകുന്ന വേറൊരു ഭ്രമണവും ചെയ്യുന്നുണ്ട്‌. ഇത്‌ പുരസ്സരണം (precession) എന്ന പേരില്‍ അറിയപ്പെടുന്നു. പമ്പരം കറങ്ങുമ്പോള്‍ നമുക്ക്‌ അതിന്റെ പുരസ്സരഭ്രമണവും കാണാവുന്നതാണ്‌.

(പുരസ്സരണത്തെ കുറിച്ചും അത്‌ നക്ഷത്രങ്ങളുടെ (ഉദാ: ധ്രുവ നക്ഷത്രം)സ്ഥാനത്തിനുണ്ടാക്കുന്ന മാറ്റത്തെകുറിച്ച്‌ താമസിയാതെ ഒരു പോസ്റ്റ്‌ ഇടാം.)

അപ്പോള്‍‍ ഭൂമിയുടെ അച്ചുതണ്ടിന്റെ പുരസ്സരണം മൂലം ഘടികാമണ്ഡലം ഓരോ വര്‍ഷവും 50.26‘’ (50.26 ആര്‍ക്‌ സെക്കന്റ് ) വീതം കറങ്ങികൊണ്ടിരിക്കുന്നു. അതായത്‌ വര്‍ഷം തോറും വിഷുവങ്ങളുടെ സ്ഥാനവും ഇത്രയും ദൂരം മാറുന്നു എന്ന്‌ അര്‍ത്ഥം. ഏകദേശം 71 വര്‍ഷം കൊണ്ട്‌ ഒരു ഡിഗ്രിയുടെ മാറ്റം ഉണ്ടാകും.

പണ്ട്‌ (ഏതാണ്ട്‌ 1000 വര്‍ഷങ്ങള്‍ക്ക്‌ മുന്‍പ്‌) മേഷാദി മേടത്തില്‍ ആയിരുന്നു. സൂര്യന്‍ മേഷാദിയില്‍ വരുന്ന ദിവസം ആയിരുന്നു നമ്മള്‍ വിഷുവായി ആഘോഷിച്ചിരുന്നത്‌. എന്നാല്‍ വിഷുവങ്ങളുടെ പുരസ്സരണം കാരണം മേഷാദി ഇപ്പോള്‍ മീനം രാശിയില്‍ ആണ്‌. എന്നിട്ടും നമ്മള്‍ വിഷു ആഘോഷിക്കുന്നത്‌ മേടത്തില്‍ ആണ്. ഇതേ പോലെ തുലാദി ഇപ്പോള്‍ കന്നി രാശിയില്‍ ആണ്‌.