Sunday, July 16, 2006

ഖഗോളം, നക്ഷത്ര രാശികള്‍

രാത്രിയില്‍ ആകാശത്ത്‌ കാണുന്ന നക്ഷത്രങ്ങള്‍ നമ്മളെ എപ്പോഴും വിസ്മയിപ്പിച്ചിട്ടില്ലേ? നഗ്ന നേത്രങ്ങള്‍ കൊണ്ട്‌ നമ്മള്‍ക്ക്‌ എകദേശം 6000-ത്തോളം നക്ഷത്രങ്ങളെ കാണാന്‍ സാധിക്കും. ഒരു ബൈനോക്കുലറോ ദൂരദര്‍ശിനിയോ ഉണ്ടെങ്കില്‍ അവയുടെ എണ്ണം ലക്ഷകണക്കിനാകുന്നു.
നമ്മുടെ പൂര്‍വ്വികര്‍ ഈ നക്ഷത്രകൂട്ടങ്ങള്‍ ആകാശത്ത്‌ ചില പ്രത്യേക രൂപത്തില്‍ കാണപ്പെടുന്നതായി മനസ്സിലാക്കി. ഇങ്ങനെ കാണപ്പെട്ട രൂപത്തെ അവര്‍ നക്ഷത്ര രാശി എന്നു വിളിച്ചു. ഇംഗ്ലീഷില്‍ ഇതിനു Constellation എന്ന്‌ പറയുന്നു. ഇത്‌ ഏതൊക്കെയാണെന്ന്‌ ഒന്ന്‌ പരിചയപ്പെടാം.

ഭൂമിയുടെ ചുറ്റും ആകാശം ഒരു ഗോളമായി കറങ്ങി കൊണ്ടിരിക്കുന്നു എന്ന്‌ സങ്കല്‍പ്പിക്കുക. (നമ്മള്‍ ഭൂമിയില്‍ നിന്ന്‌ നിരീക്ഷിക്കുമ്പോള്‍ നമുക്ക്‌ അങ്ങനെ ആണല്ലോ തോന്നുന്നത്‌. അതിനാല്‍ അങ്ങനെ സങ്കല്‍പ്പിക്കുന്നത്‌ കൊണ്ട്‌ ഒരു കുഴപ്പവും ഇല്ല. കാരണം ഈ ലേഖനത്തില്‍ വിവരിക്കുന്നതെല്ലാം ഭൂമിയില്‍ നിന്നുള്ള നിരീക്ഷണത്തെ അടിസ്ഥാനമാക്കിയുള്ളതാണ്‌.)

ഈ ഗോളത്തിന്റെ ഉപരിതലത്തിലൂടെ സൂര്യനും, ചന്ദ്രനും, നക്ഷത്രങ്ങളും എല്ലാം ഭൂമിയുടെ ചുറ്റും കറങ്ങി കൊണ്ടിരിക്കുന്നു എന്നും സങ്കല്‍പ്പിക്കുക. ജ്യോതിശാത്രജ്ഞന്മാര്‍ ഈ സാങ്കല്‍പ്പിക ഗോളത്തെ ഖഗോളം എന്ന്‌ വിളിക്കുന്നു. ഇംഗ്ലീഷില്‍ ഇതിന്‌ Celestial sphere എന്നാണ്‌ പേര്‌. ഖഗോളത്തിന്റെ ഒരു രേഖാചിത്രം താഴെ കൊടുക്കുന്നു.

ഖഗോളം

ജ്യോതിശാസ്ത്രജ്ഞന്മാര്‍ ഈ ഖഗോളത്തെ 88 ഭാഗങ്ങളായി വിഭജിച്ച്‌ അവയ്ക്ക്‌ ഓരോന്നിനും ഓരോ പേരും കൊടുത്തു. ഇതാണ്‌ നക്ഷത്ര രാശികള്‍ അല്ലെങ്കില്‍ Constellations എന്ന പേരില്‍ അറിയപ്പെടുന്നത്‌. അപ്പോള്‍ നമ്മള്‍ ആകാശത്ത്‌ കാണുന്ന നക്ഷത്രങ്ങള്‍ എല്ലാം ഈ 88 നക്ഷത്രരാശികളില്‍ ഒന്നില്‍ പെടും.


ഇനി ഈ ഖഗോളത്തെ നമ്മള്‍ നടുക്കുകൂടി കീറീ രണ്ടായി പകുക്കുന്നു എന്ന്‌ കരുതുക. ഉത്തര ഭാഗവും ദക്ഷിണ ഭാഗവും. ഇങ്ങനെ ചെയ്താല്‍ നമ്മള്‍ക്ക്‌ കിട്ടുന്ന രണ്ട്‌ ഭാഗങ്ങള്‍ ഇവിടെ കൊടുത്തിരിക്കുന്നു. ഇതില്‍ വലിയ അക്ഷരത്തില്‍ കാണുന്നതാണ്‌ നക്ഷത്രരാശിയുടെ പേര്‍ അതിനോട്‌ ചേര്‍ന്ന്‌ അതിന്റെ രേഖാചിത്രവും കാണാം.


ഉത്തര ഭാഗം





ദക്ഷിണ ഭാഗം


ഇനി ഈ ഖഗോളത്തിന്റെ മദ്ധ്യ രേഖയുടെ അപ്പുറവും ഇപ്പുറവും ഉള്ള നക്ഷത്രരാശികളെ നമുക്കൊന്ന്‌ പരിശോധിക്കാം. അതിന്റെ ഒരു രേഖാചിത്രം താഴെ കൊടുക്കുന്നു.



ഈ നക്ഷത്രരാശികള്‍ക്ക്‌ ചില പ്രത്യേകതകള്‍ ഉണ്ട്‌. സൂര്യനും, ചന്ദ്രനും, മറ്റ്‌ ഗ്രഹങ്ങളുമെല്ലാം ഈ നക്ഷത്രരാശിയിലൂടെ ആണ്‌ ഭൂമിയെ ചുറ്റുന്നത്‌. അതിനാല്‍ ഇത്‌ സൂര്യ രാശി എന്ന പേരില്‍ അറിയപ്പെടുന്നു. രാശി ചക്രം എന്നും ഇതിനെ വിളിക്കാറുണ്ട്‌. ഇംഗ്ലീഷില്‍ zodiac എന്ന പേരില്‍ അറിയപ്പെടുന്നു.

ഈ ഒരു ചക്രവും വച്ചാണ്‌ നമ്മുടെ ജ്യോതിഷപണ്ഡിതന്മാര്‍ കളിക്കുന്നത്‌. ബൂലോഗത്ത്‌ നമ്മുടെ ഉമേഷേട്ടന്റെ പോസ്റ്റുകളില്‍ പറയുന്ന സൂര്യരാശി ഇതാണ്‌.

രാശി ചക്രം

ഒരു വൃത്തത്തിന്റെ ആവൃത്തി 360° ആണെന്ന്‌ നിങ്ങള്‍ക്ക്‌ അറിയാമല്ലോ. നമ്മുടെ പൂര്‍വികര്‍ ഈ രാശിചക്രവൃത്തത്തെ 30° വീതമുള്ള 12 തുല്ല്യ ഭാഗങ്ങളായി വിഭജിച്ചു. ഓരോ ഭാഗത്തും ഉള്ള നക്ഷത്ര രാശിയുടെ രൂപത്തിനനുസരിച്ച്‌ അതിന്‌ ഓരോ പേരും കൊടുത്തു. മീനിന്റെ രൂപമുള്ള നക്ഷത്ര രാശിയെ മീനം എന്നും, സിംഹത്തിന്റെ രൂപം ഉള്ള രാശിയെ ചിങ്ങം എന്നും അതു പോലെ രാശിചക്രത്തിലെ ഓരോ നക്ഷത്രരാശിക്കും അതിന്റെ രൂപത്തിനനുസരിച്ച്‌ ഓരോ പേര്‌ കൊടുത്തു. ഇപ്പോള്‍ എങ്ങനെ ആണ്‌ ചിങ്ങം, കന്നി മുതലായ പേരുകള്‍ വന്നതെന്ന്‌ നിങ്ങള്‍ക്ക്‌ മനസ്സിലായല്ലോ.

ഒരു സൂര്യരാശിയുടെ വലിപ്പം 30° ആണെന്ന്‌ പറഞ്ഞല്ലോ. ഖഗോളം ഭൂമിയുടെ ചുറ്റും തിരിയുമ്പോള്‍ 30 ദിവസത്തോളം സൂര്യന്‍ ഈ 12 രാശികളില്‍ ഒന്നിന്റെ ഉള്ളില്‍ ആയിരിക്കും. അപ്പോള്‍ ആ മാസത്തെ നമ്മള്‍ ആ രാശിയുടെ പേരിട്ട്‌ വിളിക്കുന്നു. ഉദാഹരണത്തിന്‌ ചിങ്ങമാസം ആണെന്ന്‌ പറഞ്ഞാല്‍ അതിന്റെ അര്‍ത്ഥം സൂര്യന്‍ ഇപ്പോള്‍ ചിങ്ങം രാശിയില്‍ ആണ്‌ എന്നാണ്‌.

ഇനി സൂര്യന്‍ ഒരു രാശിയില്‍ നിന്ന്‌ അടുത്തരാശിയിലേക്ക്‌ മാറുന്നതിനെ രാശി സംക്രമണം എന്ന്‌ പറയുന്നു. ഉദാഹരണത്തിന്‌ സൂര്യന്‍ ധനുരാശിയില്‍ നിന്ന്‌ മകരരാശിയിലേക്ക്‌ മാറുന്നതിനെ മകരസംക്രമണം എന്ന്‌ പറയുന്നു. ഈ സമയത്താണ്‌ ശബരിമലയില്‍ മകരവിളക്ക്‌.

അനുബന്ധം

88 നക്ഷത്രരാശികളുടെ പേര്‌

എല്ലാ നക്ഷത്ര രാശിക്കും മലയാളം പേരുകള്‍ ഇല്ല. എനിക്ക്‌ അറിയാവുന്നത്‌ ബ്രാക്കറ്റില്‍ കൊടിത്തിരിക്കുന്നു. അതല്ലാതെ ഈ പട്ടികയില്‍ ഉള്ള ഏതെങ്കിലും നക്ഷത്രരാശികളുടെ മലയാളം പേര്‌ അറിയാമെങ്കില്‍ അത്‌ തരിക.

  1. Andromeda
  2. Antlia
  3. Apus
  4. Aquarius (കുംഭം)
  5. Aquila
  6. Ara
  7. Aries (മേടം)
  8. Auriga
  9. Boötes
  10. Caelum
  11. Camelopardalis
  12. Cancer (കര്‍ക്കടകം)
  13. Canes Venatici
  14. Canis Major
  15. Canis Minor
  16. Capricornus (മകരം)
  17. Carina
  18. Cassiopeia
  19. Centaurus
  20. Cepheus
  21. Cetus
  22. Chamaeleon
  23. Circinus
  24. Columba
  25. Coma Berenices
  26. Corona Austrina
  27. Corona Borealis
  28. Corvus
  29. Crater
  30. Crux
  31. Cygnus
  32. Delphinus
  33. Dorado
  34. Draco
  35. Equuleus
  36. Eridanus
  37. Fornax
  38. Gemini (മിഥുനം)
  39. Grus
  40. Hercules
  41. Horologium
  42. Hydra
  43. Hydrus
  44. Indus
  45. Lacerta
  46. Leo (ചിങ്ങം)
  47. Leo Minor
  48. Lepus
  49. Libra (തുലാം)
  50. Lupus
  51. Lynx
  52. Lyra
  53. Mensa
  54. Microscopium
  55. Monoceros
  56. Musca
  57. Norma
  58. Octans
  59. Ophiuchus
  60. Orion
  61. Pavo
  62. Pegasus
  63. Perseus
  64. Phoenix
  65. Pictor
  66. Pisces (മീനം)
  67. Piscis Austrinus
  68. Puppis
  69. Pyxis
  70. Reticulum
  71. Sagitta
  72. Sagittarius (ധനു)
  73. Scorpius (വൃശ്ചികം)
  74. Sculptor
  75. Scutum
  76. Serpens
  77. Sextans
  78. Taurus (ഇടവം)
  79. Telescopium
  80. Triangulum
  81. Triangulum Australe
  82. Tucana
  83. Ursa Major
  84. Ursa Minor
  85. Vela
  86. Virgo (കന്നി)
  87. Volans
  88. Vulpecula

41 comments:

Shiju said...

ഇതാ ജ്യോതിശാസ്ത്രത്തെ കുറിച്ചുള്ള ആദ്യത്തെ പോസ്റ്റ്‌. നിങ്ങള്‍ക്ക്‌ ഇതൊക്കെ അറിയാമായിരിക്കുമെങ്കിലും കൂടുതല്‍ ഗഹനമായ വിഷങ്ങള്‍ കൈകാര്യം ചെയ്യുന്നതിന്‌ മുന്‍പ്‌ ഇത്തരത്തില്‍ ഒരു ആമുഖം നല്ലതാണ്‌.

Manjithkaini said...

നല്ല ലേഖനം ഷിജൂ. ഇത് ആറ്റിക്കുറുക്കി ഒന്നു വിക്കിയിലിടാമോ?

Cibu C J (സിബു) said...

ഇംഗ്ലീഷുകാരുടെ രാശികളും മലയാളികളുടെ രാശികളും ഒരേ പേരിലായതെങ്ങനെ ?! ഇനി പേരുമാത്രമേ ഒരു പോലെയായുള്ളൂ? അവയുടെ ലൊക്കേഷനും ഒന്നാണോ?

ചിങ്ങം = സിംഹം = ലിയോ
കന്നി = വിര്‍ഗോ
...

രാജ് said...

സിബു ഷിജുവിന്റെ ലേഖനത്തില്‍ ഒരു തെറ്റുണ്ടെന്നു തോന്നുന്നു. മലയാളികളുടെ രാശികള്‍/മാസം ചന്ദ്രനെ ആസ്പദമാക്കിയാണു്, പാശ്ചാത്യരുടേതു സൂര്യനെ ആസ്പദമാക്കിയും. മെയ് മാസത്തില്‍ ജനിച്ച ഞാന്‍ സൂര്യരാശിപ്രകാരം ഇടവക്കൂറാണു്, മലയാളമാസപ്രകാരം മേടത്തിലും. ആകെ ഒരു കണ്‍‌ഫ്യൂഷന്‍. സൂര്യന്‍ ഭൂമിയെ ചുറ്റുകയാണെന്നുള്ള സങ്കല്പവും തെറ്റല്ലേ, സൂര്യനു ആപേക്ഷികമായി നക്ഷത്രമണ്ഡലങ്ങള്‍ വിഭജിക്കുന്നതല്ലേ ശരിയായി രീതി (സൂര്യന്റെ ബാക്ക്‍ഗ്രൌണ്ടില്‍ വരുന്ന നക്ഷത്രസമൂഹം അങ്ങിനെയല്ലേ?)

Shiju said...

പെരിങ്ങോടന്‍,
ഞാന്‍ ഈ ലേഖനത്തിലൂടെ ജ്യോതിഷം അല്ല പറയാന്‍ ശ്രമിക്കുന്നത്‌. എന്റെ ലക്ഷ്യം ജ്യോതിശാസ്ത്രം തന്നെയാണ്‌. നിരീക്ഷണ ജ്യോതിശസ്ത്രത്തില്‍ വരുന്ന ചില പ്രധാന സംജ്ഞകളെ ആണ്‌ അടുത്ത ചില ലേഖനങ്ങളില്‍ കൂടി പരിചയപ്പെടുത്താന്‍ ഉദ്ദേശിക്കുന്നത്‌. അതിന്‌ ഒരു തുടക്കം ആയി ആണ്‌ ഈ ലേഖനം എഴുതിയത്‌. സന്ദര്‍ഭത്തിന്‌ ഉചിതം ആയി ജ്യോതിഷത്തെകുറിച്ച്‌ സൂചിപ്പിച്ചു എന്നേ ഉള്ളൂ.

എന്തായാലും എല്ലാവര്‍ക്കും ഇക്കാര്യത്തില്‍ സംശയങ്ങള്‍ ഉള്ള സ്ഥിതിക്ക്‌ അടുത്ത പോസ്റ്റില്‍ കേരളീയ ജ്യോതിശാസ്ത്രവും പാശ്ചാത്യ ജ്യോതിശാസ്ത്രവും താരതമ്യം ചെയ്തു കൊണ്ടുള്ള ഒരു ലേഖനം ഇടാം. അപ്പോള്‍ സിബുചേട്ടന്റെ ചോദ്യത്തിനും പെരിങ്ങോടന്റെ ഈ ചോദ്യത്തിനും ഉള്ള ഉത്തരങ്ങള്‍ ലഭിക്കും.

Shiju said...

പെരിങ്ങോടന്‍ said... സൂര്യന്‍ ഭൂമിയെ ചുറ്റുകയാണെന്നുള്ള സങ്കല്പവും തെറ്റല്ലേ, സൂര്യനു ആപേക്ഷികമായി നക്ഷത്രമണ്ഡലങ്ങള്‍ വിഭജിക്കുന്നതല്ലേ ശരിയായി രീതി (സൂര്യന്റെ ബാക്ക്‍ഗ്രൌണ്ടില്‍ വരുന്ന നക്ഷത്രസമൂഹം അങ്ങിനെയല്ലേ?)



പെരിങ്ങോടന്‍ ഈ വാചകം വായിച്ചില്ല എന്ന്‌ തോന്നുന്നു.

ഭൂമിയുടെ ചുറ്റും ആകാശം ഒരു ഗോളമായി കറങ്ങി കൊണ്ടിരിക്കുന്നു എന്ന്‌ സങ്കല്‍പ്പിക്കുക. (നമ്മള്‍ ഭൂമിയില്‍ നിന്ന്‌ നിരീക്ഷിക്കുമ്പോള്‍ നമുക്ക്‌ അങ്ങനെ ആണല്ലോ തോന്നുന്നത്‌. അതിനാല്‍ അങ്ങനെ സങ്കല്‍പ്പിക്കുന്നത്‌ കൊണ്ട്‌ ഒരു കുഴപ്പവും ഇല്ല. കാരണം ഈ ലേഖനത്തില്‍ വിവരിക്കുന്നതെല്ലാം ഭൂമിയില്‍ നിന്നുള്ള നിരീക്ഷണത്തെ അടിസ്ഥാനമാക്കിയുള്ളതാണ്‌.)

രാജ് said...

വായിച്ചിരുന്നു. പക്ഷെ സൂര്യന്‍ കറങ്ങുന്നില്ല, ഭൂമിയില്‍ നിന്നും സൂര്യനെ നിരീക്ഷിക്കുമ്പോള്‍ സൂര്യനു ചുറ്റുമുള്ള നക്ഷത്രമണ്ഡലം കറങ്ങുന്നു (അപ്പോള്‍ സൂര്യന്‍ ഓരോരോ രാശിയിലായി തോന്നും) എന്നു സങ്കല്പിക്കുകയാവും യുക്തിപരമായി ശരിയെന്നു തോന്നി. സൂര്യനും നക്ഷത്രഗോളങ്ങളും എല്ലാം ഒരുമിച്ചു കറങ്ങുമ്പോള്‍ സൂര്യന്റെ പൊസിഷന്‍ മാറുന്നതെങ്ങിനെ എന്ന് ഈ ലേഖനം ലക്ഷ്യമിട്ടുള്ള വായനക്കാര്‍ തെറ്റിദ്ധരിക്കേണ്ടാ എന്നേ ഞാനുദ്ദേശിച്ചുള്ളൂ.

Shiju said...

പുല്ലൂരാന്‍ ചേട്ടാ ചൂണ്ടിക്കാണിച്ചത്‌ ശരിയാണ്‌. വൃശ്ചികവും തുലാം തമ്മില്‍ മാറിപോയിട്ടുണ്ട്‌. image editing-ല്‍ പറ്റിയ തെറ്റാണ്‌. ശരിയാക്കിയ പടം upload} ചെയ്യാന്‍ പറ്റുന്നില്ല. Blogger പണി മുടക്കിയിരിക്കുകയാണ്‌. തല്‍ക്കാലം ശരിയാക്കിയ പടം ഇവിടെ upload ചെയ്തിട്ടുണ്ട്‌.

നന്ദി

ഉമേഷ്::Umesh said...

ഷിജൂ,

കൊള്ളാം. ജ്യോതിശ്ശാസ്ത്രം പഠിച്ചിട്ടുള്ള ഷിജു ഇങ്ങനെ ഈടുറ്റ ലേഖനങ്ങള്‍ പ്രസിദ്ധീകരിച്ചാല്‍ വലിയ ഉപകാരമായിരുന്നു. ഭാരതീയജ്യോതിശ്ശാസ്ത്രത്തെപ്പറ്റി എഴുതുന്നതില്‍ നിന്നു് എന്നെ പിന്തിരിപ്പിച്ചതു് ഇങ്ങനെയുള്ള സാമാന്യവിവരങ്ങള്‍ ആദ്യം പറയാനുള്ള മടിയാണു്.

ഈ “ഖഗോളം” എന്നതു Celestial Sphere-ന്റെ മലയാളം/സംസ്കൃതം ആണോ? Heavenly body എന്ന അര്‍ത്ഥത്തില്‍ (സൂര്യന്‍, ചന്ദ്രന്‍ തുടങ്ങിയവ) ആണു് ഞാന്‍ അതു് ഉപയോഗിച്ചിരുന്നതു്. (സിബു ഇടയ്ക്കു ചോദിച്ചതു് ഇതാണോ?) എവിടെ നിന്നാണു് എനിക്കു് ഇതു കിട്ടിയതെന്നു് ഓര്‍മ്മയില്ല. തെറ്റാണെങ്കില്‍ തിരുത്തേണ്ടിയിരിക്കുന്നു.

സിബുവിന്റെയും പെരിങ്ങോടന്റെയും ചോദ്യത്തിനുത്തരം ഇവിടെ.

രാജ് said...

ചന്ദ്രനെ ആസ്പദമാക്കിയുള്ള ആ ഇന്ത്യന്‍ കലണ്ടറുകള്‍ ഏതൊക്കെയാണു് ഉമേഷേ?

Santhosh said...

നല്ല ലേഖനം, ഷിജൂ.

ഉമേഷ്::Umesh said...

പെരിങ്ങോടാ,

പൂര്‍ണ്ണമായും ചന്ദ്രനെ ആശ്രയിക്കുന്ന ഇന്‍ഡ്യന്‍ കലണ്ടറുകളൊന്നും (Lunar calendars) എനിക്കറിയില്ല. (ഇസ്ലാമിക് കലണ്ടറൊഴികെ ലൂണാര്‍ കലണ്ടുറകളൊന്നും എനിക്കു പരിചയമില്ല). ഇന്ത്യയില്‍ പണ്ടുതൊട്ടേ ഉണ്ടായിരുന്നതു Lunisolar കലണ്ടറുകള്‍ ആയിരുന്നു. വര്‍ഷം സൂര്യനെ അടിസ്ഥാനമാക്കിയും (അല്ലെങ്കില്‍ സീസണുകളും കൃഷിയുമൊക്കെ അവതാളത്തിലാവും) മാസങ്ങള്‍ ചന്ദ്രനെ അടിസ്ഥാനമാക്കിയുമായിരുന്നു. ഓരോ മാസത്തിലും പ്രഥമ, ദ്വിതീയ തുടങ്ങി 30 ദിവസങ്ങളായിരുന്നു. അങ്ങനെ വരുമ്പോള്‍ പന്ത്രണ്ടു മാസം കഴിയുമ്പോള്‍ കുറെ ദിവസത്തിന്റെ വ്യത്യാസം വരും. അതു നികത്താന്‍ അധിമാസങ്ങള്‍ (leap months) ചേര്‍ത്താണു് ഇതു പരിഹരിച്ചിരുന്നതു്.

ഹിന്ദു കലണ്ടറുകളെപ്പറ്റി പറയുക എളുപ്പമല്ല. പലതരം കലണ്ടറുകളുണ്ടു്. ഇപ്പോള്‍ കലണ്ടറുകളില്‍ കാണുന്ന ശകവര്‍ഷം (1957-ല്‍ ഉണ്ടാക്കിയതു്) പൂര്‍ണ്ണമായും സൂര്യനെ ആസ്പദമാക്കിയുള്ള കലണ്ടറാണു്. ഉത്തരേന്ത്യയിലെ പാരമ്പര്യജ്യോതിശ്ശാസ്ത്രജ്ഞര്‍ ഇതിനെ അംഗീകരിച്ചിട്ടില്ല.

കൊല്ലവര്‍ഷക്കലണ്ടര്‍ സൌരഗണനമാണു് ഉപയോഗിക്കുന്നതു് വര്‍ഷത്തിനും മാസത്തിനും. സൂര്യന്‍ ഓരോ രാശിയിലും കടക്കുമ്പോഴാണു് ഓരോ മാസവും തുടങ്ങുന്നതു്. ദിവസം പറയാന്‍ തിഥിയല്ല മലയാളികള്‍ പറയുക. പലപ്പോഴും നക്ഷത്രം പറയും. അല്ലെങ്കില്‍ തീയതി പറയും. ഉത്തരേന്ത്യന്‍ കലണ്ടറുകളില്‍ തീയതിയും തിഥിയും ഒന്നുതന്നെയായിരുന്നു.

തമിഴ് കലണ്ടര്‍ മേല്‍പ്പറഞ്ഞ ഉത്തരേന്ത്യന്‍ കലണ്ടറിനെ ആസ്പദമാക്കിയുള്ളതാണു്.

ഈ അധിമാസത്തിന്റെ വ്യത്യാസമാണു് അജ്ഞാതവാസം കഴിഞ്ഞോ ഇല്ലയോ എന്നു് കൌരവര്‍ക്കു കണ്‍‌ഫ്യൂഷന്‍ ഉണ്ടാക്കിയതു് എന്നു എം. ടി. “രണ്ടാമൂഴ”ത്തില്‍ പറയുന്നു. അതു ശരിയാണെന്നു തോന്നുന്നില്ല. മഹാഭാരതകാലത്തു് ഈ കലണ്ടര്‍ ഉണ്ടായിരുന്നു എന്നു് എനിക്കു തോന്നുന്നില്ല. മഹാഭാരതം (കുഞ്ഞിക്കുട്ടന്‍ തമ്പുരാന്റെയോ പ്രതാപചന്ദ്രറായിയുടെയോ മറ്റോ നേര്‍തര്‍ജ്ജമ - എഴുത്തച്ഛന്റെയല്ല) ആരുടെയെങ്കിലും കയ്യിലുണ്ടെങ്കില്‍ ഒന്നു പരിശോധിക്കുമോ? വിരാടപര്‍വ്വത്തിന്റെ അവസാനത്തിലാവും ഇതു് ഉണ്ടാവുക.

Shiju said...

ഉമേഷേട്ടാ Celestial sphere-ന്റെ മലയാളം/സംസ്കൃതം ഖഗോളം എന്ന്‌ തന്നെയാണ്‌ എന്റെ അറിവ്‌. ഞാന്‍ പഠിച്ചത്‌ മംഗ്ലീഷ്‌ മീഡിയത്തിലായത്‌ കൊണ്ട്‌ (അതിന്റെ ഫലം ഇപ്പോഴും അനുഭവിച്ചു കൊണ്ടിരിക്കുന്നു) ഇതിന്റെ ഒക്കെ മലയാളം അര്‍ത്ഥം ഞാന്‍ യുറീക്കാ, ശാസ്ത്രകേരളം, കേരള ശാസ്ത്രപരിഷത്തിന്റെ മറ്റ്‌ പുസ്തകങ്ങളിലൂടെ ഒക്കെ ആണ്‌ പരിചയപ്പെടുന്നത്‌. അതിനാല്‍ അത്രയ്ക്ക്‌ ആധികാരികമായി പറയാന്‍ വയ്യ.

ഖഗോളത്തിന്‌ വേറൊരു pure മലയാളം പേരും ഉണ്ട്‌. അത്‌ എത്ര ആലോചിച്ചിട്ടും കിട്ടുന്നില്ല. എന്റെ ജ്യോതിശാസ്ത്രപരമായ പുസ്തകങ്ങള്‍ ഒക്കെ വീട്ടില്‍ (പാലക്കാട്‌) ഇരിക്കുകയാണ്‌. അതിനാല്‍ ഒന്ന്‌ പരിശോധിക്കാനും മാര്‍ഗ്ഗമില്ല. ഇനി വീട്ടില്‍ പോകുമ്പോള്‍ എല്ലാം എടുത്ത്‌ കൊണ്ട്‌ വരണം.

ഇന്‍ഡ്യയില്‍ ജ്യോതിശാസ്ത്ര/ജ്യോതിര്‍ഭൌതിക-പരമായ ഗവേഷണങ്ങള്‍ ഒക്കെ co-ordinate ചെയ്യുന്ന ശാസ്ത്രഗവേഷണ സ്ഥാപനമാണ്‌ പൂണെയിലുള്ള IUCAA (Inter University Center for Astronomy and Astrophyscis). ഇവരുടെ ന്യൂസ്‌ ലെറ്ററിന്റെ പേര്‌ Khagol എന്നാണ്‌. ആ ന്യൂസ്‌ ലെറ്ററില്‍ ഖഗോളത്തിന്‌ കൊടുത്തിരിക്കുന്ന അര്‍ത്ഥം Celestial Sphere എന്ന്‌ തന്നെയാണ്‌. ഈ PDF ന്യൂസ്‌ ലെറ്റര്‍ കാണാന്‍ ഇവിടെ ഞെക്കുക. എട്ടാമത്തെ പേജില്‍ കൊടുത്തിരിക്കുന്ന അര്‍ത്ഥം നോക്കുക.

Shiju said...

ഉമേഷേട്ടാ ഇത്‌ എന്തായാലും നന്നായി. ജ്യോതിഷപരമായ ചോദ്യങ്ങള്‍ക്ക്‌ ഉമേഷേട്ടന്‍ ഉത്തരം പറഞ്ഞാല്‍ നന്നായിരിക്കും. എനിക്ക്‌ അതില്‍ അത്ര അറിവ്‌ പോര. ഇനി പഠിക്കാം എന്ന്‌ വച്ചാലും പുസ്തകങ്ങള്‍ ഒക്കെ വീട്ടില്‍ ആണ്‌. താങ്കളുടെ പ്രതികരണങ്ങള്‍ എന്ന ബ്ലോഗ്ഗില്‍ നിന്ന്‌ അനന്തം, അജ്ഞാതം, അവര്‍ണ്ണനീയം ബ്ലോഗ്ഗിലേക്ക്‌ കൊടുത്തിരിക്കുന്ന ലിങ്കില്‍ ചെറിയ ഒരു പ്രശ്നം ഉണ്ട്‌. അത്‌ ഒന്നുകൂടി പുതുക്കി കൊടുക്കുമല്ലോ?

ഉമേഷ്::Umesh said...

ഷിജു,

ജ്യോതിര്‍ഗോളം എന്നാണോ?

ഖഗോളം എന്നതു് Celestial sphere എന്നതിന്റെ അംഗീകൃതമലയാളം ആണെങ്കില്‍ ഞാന്‍ എഴുതിയിട്ടുള്ള ഭാഗങ്ങള്‍ തിരുത്താം. എനിക്കിതു കിട്ടിയതു് ഏതോ പ്രാചീനസംസ്കൃതഗണിതഗ്രന്ഥത്തില്‍ നിന്നാണെന്നു തോന്നുന്നു. പുസ്തകങ്ങളൊക്കെ ഒന്നു തപ്പണം.

ലിങ്കില്‍ ഞാന്‍ തെറ്റൊന്നും കാണുന്നില്ലല്ലോ. എന്താണു തെറ്റു്? ഞാന്‍ ബ്ലോഗിലേക്കല്ല, പോസ്റ്റിലേക്കാണു ലിങ്കു ചെയ്തതു്.

പാപ്പാന്‍‌/mahout said...

ഷിജൂ, ഒരു “ഉമേഷ്” നിലവാരത്തിലുള്ള പോസ്റ്റു തന്നെ ഇത്! സമ്മതിച്ചിരിക്കുന്നു!

ഖഗോളം Celestial Sphere ആണെന്നാണു ഞാനും വായിച്ചിട്ടുള്ളത്.

പാശ്ചാത്യരും ഇന്ത്യാക്കാരും രാശിചക്രത്തിലെ നക്ഷത്രക്കൂട്ടങ്ങള്‍‌ക്കു എങ്ങനെ ഒരേ പേരു നല്‍കി (ചിങ്ങം - ലിയോ മുതലായവ)? ബാക്കി പലതും വ്യത്യസ്തമാണല്ലോ - കാര്‍ത്തിക (pleiades, വക്കാരിയുടെ ഭാഷയില്‍ subaru എന്നും പറയും), മുഴക്കോല്‍ (ഓറയോണിന്റെ ബെല്‍റ്റ്) മുതലായവ ഉദാഹരണം.

ഞാറ്റുവേലകളെപ്പറ്റി കൂടുതലറിയാമോ ഷിജുവിനോ ഉമേഷിനോ?

ശകവര്‍ഷം പൂര്‍ണ്ണമായും സൌരകലണ്ടറാണോ? പൂര്‍ണ്ണചന്ദ്രന്‍ ഏതു താ‍രാഗണത്തിന്റെ കൂടെയാണെന്നുള്ളതാണു മാസങ്ങളുറ്റെ പേരിനടിസ്ഥാനം എന്നെവിടെയോ വായിച്ചപോലെ. അശ്വതിയിലാണെങ്കില്‍ ആശ്വിനം, മകയിരം അഥവാ മൃഗശീര്‍ഷത്തിലാണെങ്കില്‍ മാര്‍ഗ്ഗശീര്‍ഷം എന്നൊക്കെ.

Shiju said...

പാപ്പാന്‍ ചേട്ടാ,
ഞാനീ ലേഖനത്തില്‍ വിവരിച്ചത്‌ നക്ഷത്രകൂട്ടങ്ങളെ കുറിച്ച്‌ മാത്രമാണ്‌. അതില്‍ ചിങ്ങം, കന്നി മുതലായവ സൂര്യരാശിയില്‍ വരുന്ന നക്ഷത്രകൂട്ടങ്ങള്‍ മത്രമാണ്‌. മറ്റ്‌ നക്ഷത്രകൂട്ടങ്ങളെ കുറിച്ചും നക്ഷത്രങ്ങളെ കുറിച്ചും തുടര്‍ന്നുള്ള ലേഖനങ്ങളില്‍ വിവരിക്കാം. അപ്പോള്‍ ഓറിയോണ്‍, കാര്‍ത്തിക ഇവയെ കുറിച്ചൊക്കെ പറയാം.

ഞാറ്റുവേല എന്ന്‌ പറഞ്ഞാല്‍ സൂര്യനുള്ള വേള എന്നാണ്‌ അര്‍ത്ഥം. നാളുകളെകുറിച്ച്‌ പറയുമ്പോള്‍ അതിനെകുറിച്ച്‌ സൂച്ചിപ്പിക്കാം. ഞാറ്റുവേലയെ കുറച്ചുകൂടി അധികാരിമായി സംസാരിക്കാന്‍ ഉമെഷ്ജിക്കാവും എന്ന്‌ ഞാന്‍ കരുതുന്നു.

ജ്യോതിശാസ്ത്രം പറയാന്‍ വന്ന്‌ ഞാന്‍ ജ്യോതിഷത്തിലേക്ക്‌ പോകുകയാണോ എന്ന്‌ സംശയം.

ഉമേഷ്::Umesh said...

അപ്പോ ഖഗോളം Celestial sphere തന്നെ അല്ലേ? പാപ്പാന്‍ പറഞ്ഞാല്‍ അപ്പീ‍ലില്ല. ഞാന്‍ തിരുത്തിക്കോളാം.

ഈ പോസ്റ്റിനു പ്രതികരണങ്ങളിലിട്ട കമന്റില്‍ ഞാന്‍ പറഞ്ഞിരുന്നു. ഗ്രീസില്‍ നിന്നാണു് ജ്യോതിഷം ഇന്ത്യയിലേക്കും പടിഞ്ഞാട്ടും പോയതു്. അതിനാല്‍ ജ്യോതിഷത്തില്‍ ഉപയോഗിച്ച നക്ഷത്രക്കൂട്ടങ്ങള്‍ക്കു് ആ പേരു തന്നെ ഉറച്ചു. ജ്യോതിശ്ശാസ്ത്രം വെവ്വേറേ ആണു പുരോഗമിച്ചതു്.

0 മുതല്‍ 360 വരെയുള്ള ഡിഗ്രികളെ 27 ഭാഗങ്ങളായി തിരിച്ചതില്‍ ഓരോ ഭാഗമാണല്ല്ലോ നക്ഷത്രം. (പാപ്പാന്‍ ഈ പുസ്തകം വായിച്ചിരുന്നോ?) ചന്ദ്രന്റെ ഡിഗ്രി കാണിക്കുന്നതിനെയാണു നമ്മള്‍ നാള്‍/നക്ഷത്രം എന്നു പറയുന്നതു്. അതുപോലെ സൂര്യന്റെ ഡിഗ്രി കാണിക്കുന്നതിനെ ഞാറ്റുവേല എന്നു പറയുന്നു. ഒരു കൊല്ലത്തില്‍ 27 ഞാറ്റുവേലകളുള്ളതു കൊണ്ടു മാസങ്ങളെക്കാള്‍ നല്ല granularity കിട്ടും. സീസണുകള്‍ സൂര്യചലനത്തെ ആശ്രയിച്ചിരിക്കുന്നതുകൊണ്ടു് ഇതു കൃഷിയ്ക്കു വളരെ ഉപകാരപ്രദമാണു്. ഓരോ വിളയും (ഞാറു്) ഒരു പ്രത്യേക ഞാറ്റുവേലയില്‍ നടണമെന്നു പറഞ്ഞിരുന്നു. അങ്ങനെയാണു ഞാറ്റുവേല എന്ന പേരു വന്നതു്.

“കുടമുല്ലപ്പൂവിനും മലയാളിപ്പെണ്ണിനും...” എന്ന പാട്ടിലെ “കൂന്തല്‍ മിനുക്കാന്‍ ഞാറ്റുവേല....” എന്നു പറയുന്നതെന്താണെന്നു് ഇതുവരെ മനസ്സിലായില്ല. ഏതോ ഞാറ്റുവേലയ്ക്കാണു് കൂന്തല്‍ എന്ന മീന്‍ കിട്ടുന്നതു്, അതു മിനുക്കണം എന്നോ മറ്റോ ആണോ?

(ഇവിടേം ഞാന്‍ ഓഫ്‌ടോപ്പിക് തുടങ്ങിവെച്ചു!)

-B- said...

അവിശ്വസനീയം!! അവിശ്വസനീയം!!അവിശ്വസനീയം!!

ഉമേഷ് ജി സ്വബോധത്തില്‍ തന്നെയാണോ ഈ കമന്റ് എഴുതിയതു? കൂന്തല്‍ എന്നു കേട്ടിട്ടില്ല? കാര്‍കൂന്തല്‍ എന്നു കേട്ടിട്ടേയില്ല????

കൂന്തല്‍ മിനുക്കാന്‍, അതായത് പെണ്ണുങ്ങളുടെ മുടി മിനുക്കാന്‍ ഞാറ്റുവേല എന്നാണ് ആ പാട്ട്. തിരുവാതിര ഞാറ്റുവേലക്ക് പെണ്ണുങ്ങള്‍ മുടിയുടെ തുമ്പ് മുറിക്കും.. മുടി തഴച്ചു വളരും എന്നാണ് വിശ്വാസം.

എല്‍ജീ.. ഓടി വാ.. ഉമേഷേട്ടന്റെ മലയാളം നിഖണ്ടു കളവു പോയി.. ഇനി നമുക്ക്‌ എന്ത്‌ വിഡ്ഡിത്തം വേണമെങ്കിലും പറയാം....

Shiju said...

ഉമേഷ്::Umesh said...
ഇവിടേം ഞാന്‍ ഓഫ്‌ടോപ്പിക് തുടങ്ങിവെച്ചു


ഉമേഷ്ജി ഇത്‌ ഓഫ്‌ ടോപ്പിക്കൊന്നും അല്ല. ഇങ്ങനുള്ള ചില സംശങ്ങള്‍ക്ക്‌ ഉമേഷ്ജി ഉത്തരം പറഞ്ഞാലേ ശരിയാകൂ. അതല്ലേ ഞാന്‍ മിണ്ടാതെ ഇരുന്നത്‌. ഞാന്‍ എനിക്ക്‌ ശരിക്കറിയാത്തതിനെ കുറിച്ച്‌ പറഞ്ഞ്‌ വിഡ്ഡിതരമായി പോയാലോ?

ഉമേഷ്::Umesh said...

ബിരിയാണിക്കുട്ട്യേ,

സ്മൈലി കണ്ടില്ല്ലായിരുന്നോ? ഓ, ഞാന്‍ ഇടാന്‍ മറന്നുപോയി, അല്ല്യോ? ശ്ശോ :-)

അപ്പോള്‍ തിരുവാതിര ഞാറ്റുവേല എന്നു പറഞ്ഞാല്‍ ഏകദേശം ജൂലൈ ഒന്നിനു് അടുപ്പിച്ചു വരും. അന്നു തലമുടി മിനുക്കുന്ന ടീമാണു ബിക്കു, അല്ലേ? ബാക്കി സമയം മുഴുവന്‍ ജടപിടിച്ചു കിടക്കുമോ എന്നായിരുന്നു എന്റെ സംശയം. അപ്പോള്‍മിനുക്കുക എന്നു പറഞ്ഞാല്‍ മുറിക്കുക എന്നാണു് അര്‍ത്ഥം. അപ്പോള്‍ മറ്റേ കൂന്തലായാലും കുഴപ്പമില്ല :-)

ചുറ്റി. ഞാന്‍ കഴിഞ്ഞ തവണ തലമുടി വെട്ടിയതു തിരുവാതിര ഞാറ്റുവേലയ്ക്കാണല്ലോ. പണ്ടാരം ഇനിയും തഴച്ചുവളരുമോ? തലമുടി വെട്ടാന്‍ ഇവിടൊക്കെ എന്താ ചെലവു്...

(ബിക്കുവേ, നിഘണ്ടു. മേഘത്തിന്റെ “ഘ”.)

കുറുമാന്‍ said...

ഷിജുവേ......പ്ലീസ് ഒരു ഓഫിടട്ടേ.....കൈ തരിച്ചിട്ടു വയ്യ.

അപ്പോ ഇനിയെന്നാണാവോ അടുത്ത തിരുവാതിര ഞാറ്റുവേല ബിക്കുവേ/ഉമേഷ്ജീ.

അല്ല എന്റെ തലയില്‍ ഭാക്കി അവശേഷിക്കുന്ന മുടിയൊന്നു മുറിച്ച് പരീക്ഷിക്കാനാ......

എന്നിട്ടുപോരെ ഗല്‍ഫ് ഗേറ്റ് മുടിപിടിപ്പിക്കല്‍ കേന്ദ്രത്തിന് സംഭാവന ന്‍ല്‍കാന്‍ എന്നൊരു ശങ്ക.

-B- said...

അതു പിന്നെ, നിഖണ്ടു-ന്റെ ‘ഖ’ യുടെ അവിടെ സ്‌മൈലി ഇടാന്‍ ഞാനും മറന്നതാ...

Anonymous said...

ഹഹഹഹ്ഹ..എന്റെ ബിയിയാണിക്കുട്ടേ..ഒരു ഹൈ ഫൈ കൊടുക്കൂ..ഈ ഷിജുചേട്ടന്റെ ബ്ലോഗില്‍ കേറി ഓഫ് പറയാന്‍ പേടിയുണ്ട്..
അതോണ്ടാണ് ആ‍ദ്യം മിണ്ടാതെ ഇരുന്നെ...
പക്ഷേങ്കില്‍ ആ ‘ഖ’ക്കുള്ള സ്മൈലി കമന്റ് വായിച്ചിട്ട് പിന്നെ കമന്റാണ്ടിരുന്നാല്‍ ഞാന്‍ പിന്നെ എന്നാത്തിനാന്നെ ജീവിച്ചു ഇരിക്കണെ?

ഇനി ഷിജുചേട്ടന്‍ തല്ലിക്കൊന്നാലും എനിക്ക് കുഴപ്പമില്ല...

myexperimentsandme said...

വളരെ നല്ല ഉദ്യമം, ഷിജൂ. മൊത്തം മനസ്സിരുത്തി വായിച്ചില്ല. വായിക്കാം. ഇനിയും പോരട്ടെ.

ബിന്ദു said...

അതേ ബീക്കുട്ടീ.. ഉമേഷ്ജിക്കെന്താ പറ്റിയതെന്നു വച്ചാല്‍( ഊഹമാണേ) കൂന്തല്‍മീനൂക്കാന്‍ ഞാറ്റുവേലാ.. എന്നാണവരു പാടുന്നതു. അതേ സംശയം എനിക്കും വന്നിട്ടുണ്ട്‌.കൂന്തല്‍ മിനുക്കാന്‍ എന്നു പാടിയാല്‍ ഈണം വരില്ല എന്നു തോന്നുന്നു.
ഓഫ്‌ ടൊ. ക്ഷമിക്കണം. വക്കാരിയുടെ ആഗ്രഹം പോലെ ജ്യോതിശാസ്ത്രത്തില്‍ ലേഖനം വന്നല്ലൊ. :)

ഉമേഷ്::Umesh said...

കുറുമാനേ, ഇനി തിരുവാതിര ഞാറ്റുവേല വരാന്‍ ഒരു കൊല്ലം കഴിയണമല്ലോ. എല്ലുപൊടിയും ഫാക്ടംഫോസും കൂടി 3:2 അളവില്‍ ചേര്‍ത്തതു ട്രൈ ചെയ്തിരുന്നോ? :-)

ബിന്ദുവേ, അങ്ങനൊന്നുമല്ല. കൂന്തലിന്‍റെ അര്‍ത്ഥം തലമുടി എന്നു തന്നെ കരുതിയിരുന്നു. അതും ഞാറ്റുവേലയും തമ്മിലുള്ള ബന്ധം ബിക്കു പറഞ്ഞപ്പോഴാണു മനസ്സിലായതു്. മീനിന്‍റെ കാര്യം തമാശയായിരുന്നു :-)

ഇടിവാള്‍ said...

ഷിജുവേ.. ഒരു ഓ;ടോ:

ഇതു വായിച്ചപ്പോ, എന്റെ അമ്മാവന്റെ മോന്‍ അജിയെ ഓര്‍മ വന്നു ! പ്രീഡീഗ്രിക്ക്‌ ജസ്റ്റ്‌ പാസ്‌ ആയ അവന്‍ നക്ഷത്ര നിരീക്ഷണത്തില്‍ പീ.ഏച്‌.ഡി ആണൂ !

വല്ലപ്പോഴും വെള്ളമടിച്ച്‌ ഏനാമാവു പാടത്ത്‌ കെടക്കുമ്പഴാ ലവന്റെ, നക്ഷത്രപുരാണം !

ഡേയ്യ്‌.. ദാ കാണുന്നതാണൂ ആ +++++ നക്ഷത്രം !

വെള്ളമടിച്ചു കിറുങ്ങി, പ്രപഞ്ചത്തിലെ സകലമാന നക്ഷത്രവുമെണ്ണീ കിടക്കുന്ന ഞാന്‍ ഒന്നു മൂളും... ഊൂൂൂൂൂൂൂൂൂൂൂം.......

( മനസ്സില്‍ നല്ല കടുപ്പത്തില്‍ ഒരു തെറിയും പറയും...)

kshemikku mAshE !

Shiju said...

"ഖഗോളം, നക്ഷത്ര രാശികള്‍" എന്ന പോസ്റ്റിലെ രാശിചക്രത്തിന്റെ ചിത്രത്തിലുണ്ടായിരുന്നു ചെറിയ തെറ്റ്‌ പരിഹരിച്ച്‌ രണ്ടാമത്‌ re-publish ചെയ്തിട്ടുണ്ട്‌.

പോസ്റ്റ്‌ വായിച്ച്‌ അഭിപ്രായം പറഞ്ഞ സിബുചേട്ടന്‍, ഊമേഷ്ജി, മന്‍ജിത്‌, പെരിങ്ങോടന്‍, പുല്ലൂരാന്‍, പാപ്പാന്‍ ചേട്ടന്‍, വക്കാരി എന്നിവര്‍ക്കും ഞാറ്റുവേലയുടെ പല പല അര്‍ത്ഥങ്ങള്‍ മനസ്സിലാക്കിതന്ന ബിരിയാണിക്കുട്ടി, കുറുമാന്‍ ചേട്ടന്‍, LG ചേച്ചി, ബിന്ദു, ഇടിവാള്‍ എന്നിവരോടും പ്രത്യേക നന്ദി അറിയിക്കുന്നു.

Anonymous said...

high level of clarity, good effort, keep it up.

Shiju said...

ഈ ബ്ലോഗ്ഗിന്റെ പോസ്റ്റ് എല്ലാം http://jyothisasthram.blogspot.com എന്ന URLലേക്ക്‌ മാറ്റിയിരിക്കുന്നു. വായിക്കുവാന്‍ ഇതാ ഇവിടെ ഞെക്കൂ .

ജേക്കബ്‌ said...

ചിങ്ങമാസത്തില്‍ നമുക്ക് ചിങ്ങം രാശി കാണാന്‍ പറ്റുമോ?

Shiju said...

ജേക്കബ്‌ said...
ചിങ്ങമാസത്തില്‍ നമുക്ക് ചിങ്ങം രാശി കാണാന്‍ പറ്റുമോ?


പറ്റില്ല ചേട്ടാ. കാരണം സൂര്യന്‍ അപ്പോള്‍ ചിങ്ങം രാശിയില്‍ ആയിരിക്കും.സൂര്യന്റെ പ്രഭയാല്‍ ചിങ്ങം മാത്രമല്ല അതിനു അപ്പുറവും ഇപ്പുറവും വരുന്ന രാശികളേയും കാണാന്‍ ബുദ്ധിമുട്ടാണ്. അല്ലെങ്കില്‍ ഉദയത്തിനു തൊട്ടു മുന്‍പോ അസ്തമയത്തിനു ശേഷമോ ആകാശനിരീക്ഷണം നടത്തണം.

ജേക്കബ്‌ said...

നന്ദി ഷിജു മാഷേ ;-)

Anoop Technologist (അനൂപ് തിരുവല്ല) said...

ഷിജു, ഇത്രയും വിജ്ഞാ‍നപ്രദമായ ലേഖനം ഇത്രയും നാള്‍ വായിക്കാതെ പോയതിന് മാപ്പ്.

Anonymous said...

ഖം= ആകാശം

Anonymous said...

Sir
I am Anagha
Njan oru 8 th standard stundent anu
i m very intrested in astronomy and cosmology...
this blog is very very use ful for all the students in kerala.thank you sir for this use ful blog.
Please add some posts related to the origin of the universe.

Anonymous said...

Please add a post which describes about the origin of the universe.

T S Jayan said...

@Anagha...
I recommend you to watch the DVD series from History channel (The Univers - Complete Series - Season 1 & 2 and the DVD named "Into the Universe With Stephen Hawking" for more knowledge about the universe. If you are somewhere near to Trichur District I will be able to give you more DVD documentaries on various subjects by December. Unfortunately now I am residing in Bahrain. I have a good collection of documentaries. If any one really interested i can give them full copies free of charge. I have a collection of nearly more than 70 titles. any one can contact me to my email


Thanks to Shiju Alax & Umesh for your Valuable posts. I have just found your blogs from a FB reference of my friend. Once again thanks a lot.

Shreemazone said...

ശരിക്കും ഭൂമിയാണ് തിരിയുന്നത് സൂര്യൻ കേന്ദ്രമാണ് പിന്നെ എങ്ങനെ ഓരോര രാശിയിലും മാറിമാറി സൂര്യൻ സഞ്ചരിക്കും ???

Shreemazone said...

ശരിക്കും ഭൂമിയാണ് തിരിയുന്നത് സൂര്യൻ കേന്ദ്രമാണ് പിന്നെ എങ്ങനെ ഓരോര രാശിയിലും മാറിമാറി സൂര്യൻ സഞ്ചരിക്കും ???